काठमाडौं। बजारमा ऋणको माग नभएर बैंक तथा वित्तीय संस्थाको व्यापार खुम्चिंदा जलविद्युत कम्पनीको भने ब्यालेन्स सिट सुधारिएको छ।

नेपाल स्टक एक्सचेन्जमा सूचीकृत जलविद्युत कम्पनीले वित्तीय लागत घट्दा चालु आर्थिक वर्ष दोस्रो त्रैमासमा नाफा सतप्रतिशत बढाएका छन्।

नेप्सेमा सूचीकृत ९७ वटा जलविद्युत कम्पनीमध्ये वित्तीय विवरण सार्वजनिक गरेका ९३ कम्पनीले ७ अर्ब १ करोड ३७ लाख रुपैयाँ नाफा कमाएका छन्। हाइड्रोपावरले आर्जन गरेको यो मुनाफा पोहोर ६ महिनाको तुलनामा १०२.७१ प्रतिशत धेरै हो।

पोहोर दोस्रो त्रैमाससम्म जलविद्युत कम्पनीले ३ अर्ब ४६ करोड रुपैयाँ मुनाफा कमाएका थिए। बैंक तथा वित्तीय संस्थाको ब्याजदर निरन्तर सस्तो भइ आफ्नो लागत घटेपछि यसपालि जलविद्युत कम्पनीको नाफा बढेको हो।

हाइड्रोपावरले विद्युत बिक्रीबाट हुने आम्दानी पनि बढाएका छन्।

आर्थिक वर्षको पहिलो र दोस्रो त्रैमास जलविद्युत आयोजनाका लागि विद्युत उत्पादनका हिसाबले सिजन हो। अधिकांश जलविद्युत आयोजना नदी प्रवाह (आरओआर)मा आधारित भएकाले बर्खामा पूर्ण क्षमता र हिउँदमा नदीमा बहाब घट्ने भएकाले एक तिहाइ क्षमतामा विद्युत उत्पादन गर्छन्।

पहिलो र दोस्रो त्रैमासमा विद्युत बिक्री आम्दानी बढेका कारण ७६ वटा जलविद्युत कम्पनी नाफामा छन्। १७ कम्पनी भने नोक्सानीमा रहेको वित्तीय विवरणले देखाउँछ।

गत वर्ष दोस्रो त्रैमासमा ६६ कम्पनी नाफामा हुँदा २७ वटा नोक्सानीमा थिए। गत वर्ष नोक्सानीमा रहेका १४ कम्पनी व्यापार बढ्दा तथा लागत घटेका कारण नाफामा गएका छन्।

विद्युत बिक्री बढ्नुका साथै बैंकको ब्याजदरमा आएको गिरावटले लागत घटेका कारण नाफा बढेको ऊर्जा उत्पादकहरु बताउँछन्। स्वतन्त्र ऊर्जा उत्पादकहरुको संस्था इप्पानका महासचिव बलराम खतिवडाले अधिकांश आयोजनाले ऋण घटाएका कारण दायित्व कम हुँदा नाफा वृद्धि भएको बताए।

‘यो त्रैमास बिजुली उत्पादन राम्रो हुने बेला हो। गत वर्षभन्दा यस वर्ष विद्युत उत्पादन बढेको छ। कतिपय आयोजनाको ऋण पनि घट्दै गएको छ। यो वर्ष पछिसम्म बिजुली उत्पादन राम्रो भएको छ,’ खतिवडाले भने, ‘तेस्रो त्रैमासमा पानी परे विद्युत उत्पादन राम्रो भएर ब्यालेन्स सिटमा थप सुधार देखिन्छ। तर, अचेल हिउँदमा पानी पर्न छोडेको छ।’

जलविद्युत कम्पनीमा आयोजना निर्माण गर्दा लिएको ऋणको ब्याज भुक्तानीमा ठूलो रकम खर्च हुने गरेको छ। जसको कारण विद्युत उत्पादन नहुँदासम्म कम्पनीले ठूलो रकम वित्तीय दायित्व भुक्तानीमा खर्च गर्नुपर्ने हुन्छ। अहिले बैंक तथा वित्तीय संस्थाको ब्याजदर न्यून विन्दुमा छ।

पछिल्लो साढे तीन वर्षदेखि निरन्तर ओरालो लागिरहेको निक्षेपको ब्याजदर नै २ प्रतिशतमा आएकाले बैंकले अहिले ६ प्रतिशत ब्याजमै ऋण दिइरहेका छन्।

नेप्सेमा सूचीकृत हाइड्रोपावरको दुई आर्थिक वर्षको ६ महिनाको नाफा/नोक्सान विवरण रु लाखमा

हाइड्रोपावर	२०८२ पुस	२०८१ पुस	फरक %
अपर तामाकोशी	९९६५	-८२११	–
साहस ऊर्जा	९०४८	७०९८	२७.४७
माउन्टेन इनर्जी नेपाल	५४१४	५१२०	५.७४
ग्रिन भेन्चर्स	४६६७	३७४१	२४.७५
अपी पावर कम्पनी	४२६२	३११६	३६.७८
चिलिमे हाइड्रोपावर	३९८०	३८२८	३.९७
राधी विद्युत कम्पनी	२९८४	६३३	३७१.४१
बलेफी हाइड्रोपावर	२२८१	-१८१४	–
बुटवल पावर कम्पनी	२२५३	१९३८	१६.२५
सुपर मार्दी हाइड्रोपावर	२०५९	१२१७	६९.१९
सिंगटी हाइड्रो इनर्जी	१९६९	१४२८	३७.८९
अपर सोलु	१९३६	१४३२	३५.२
मान्डू हाइड्रोपावर	१८३०	१६२०	१२.९६
सानिमा मिडल तमोर	१८१०	२७४४	-३४.०४
स्वेत गंगा हाइड्रोपावर	१५९२	१०२५	५५.३२
अरुण काबेली	१५४४	५८९	१६२.१४
सानिमा माई हाइड्रोपावर	१२५६	२६९१	-५३.३३
ङादी हाइड्रोपावर	११५९	-८६	–
बिन्धबासिनी हाइड्रोपावर	११२०	८१०	३८.२७
सान्जेन जलविद्युत	१०८५	-१३५६	–
हिमालयन पावर पार्टनर	१०७०	९७२	१०.०८
सिक्लेस हाइड्रोपावर	१०५९	९९५	६.४३
हिमालयन ऊर्जा विकास कम्पनी	१०४५	६८०	५३.६८
अरुण भ्याली हाइड्रोपावर	१०००	१९४२	-४८.५१
पाँचथर पावर कम्पनी	९०४	-७७६	–
माथिल्लो मैलुङ खोला जलविद्युत	८५६	३५५	१४१.१३
पञ्चकन्या माई हाइड्रोपावर	८३९	२८३	१९६.४७
युनिभर्सल पावर कम्पनी	८३७	११३७	-२६.३९
मकर जितुमाया सुरी हाइड्रोपावर	८००	७५९	५.४
कालिका पावर कम्पनी	७५०	७५७	-०.९२
मिडसोलु हाइड्रोपावर	७४६	७२३	३.१८
अपर हेवाखोला हाइड्रोपावर	७४५	५५८	३३.५१
मोलुङ हाइड्रोपावर	६७४	४०१	६८.०८
तेह्रथुम पावर	६६१	३९७	६६.५
मध्य भोटेकोशी	६१२	-१९१	–
हिमालयन हाइड्रोपावर	५९०	५४९	७.४७
स्याङ्गे पावर कम्पनी	५५५	४४९	२३.६१
रुरु जलविद्युत	५२७	६००	-१२.१७
विकास हाइड्रोपावर	५०२	२४९	१०१.६१
युनाइटेड आरडीआई डडी मार्दी	४८२	४६७	३.२१
आँखु खोला	४६२	१८६	१४८.३९
नेपाल हाइड्रो डेभलपर्स	४४७	४३४	३
माया खोला हाइड्रो	४३८	७१	५१६.९
रिडि पावर कम्पनी	३७८	२४९	५१.८१
युनाइटेड मोदी	३७७	३५७	५.६
ङादी ग्रुप पावर	३६१	२३२	५५.६
मन्दाकिनी हाइड्रोपावर	३६०	३५७	०.८४
चिर्ख्वा हाइड्रोपावर	३५०	११७	१९९.१५
रिभर फल्स पावर	३२३	१३१	१४६.५६
भगवती हाइड्रोपावर	३१२	१४१	१२१.२८
इस्टर्न हाइड्रोपावर	३०७	१९२	५९.९
बुंगल हाइड्रोपावर	२७७	-११९१	–
सुपर माई हाइड्रोपावर	२७२	४५६	-४०.३५
युनियन हाइड्रोपावर	२६३	२०८	२६.४४
नेसनल हाइड्रोपावर	२५९	१०५	१४६.६७
छ्याङदी हाइड्रोपावर	२३३	-१८४	-२२६.६३
सगरमाथा जलविद्युत कम्पनी	२२५	३७३	-३९.६८
रवा इनर्जी डेभलपमेन्ट	२२४	१३४	६७.१६
बरुण हाइड्रोपावर	२१६	२६९	-१९.७
बुद्धभूमि हाइड्रोपावर	२०४	६२	२२९.०३
मनकामना इन्जिनियरिङ हाइड्रोपावर	१८६	२	९२००
मौलुङ खोला जलविद्युत	१७६	२६२	-३२.८२
सयपत्री हाइड्रोपावर	१५८	१११	४२.३४
मेन्छियम हाइड्रोपावर	१४३	-१०५१	–
इङ्वा हाइड्रोपावर	१३५	-२९	-५६५.५२
दिव्यश्वरी हाइड्रोपावर	९९	४८	१०६.२५
दोल्ती पावर कम्पनी	८७	-१	–
कुथेली बुखरी स्मल हाइड्रोपावर	८३	८८	-५.६८
दोर्दी खोला जलविद्युत	७२	-८०	–
माउन्टेन हाइड्रो नेपाल	७१	-३८१६	–
अपर स्याङे हाइड्रोपावर	५०	-१५१	–
माबिलुङ इनर्जी	४५	८	४६२.५
भुगोल इनर्जी डेभलपमेन्ट	२९	-६०	–
पिपुल्स हाइड्रोपावर कम्पनी	२५	-५६१	–
बराही हाइड्रोपावर	२३	३४	-३२.३५
राप्ती हाइड्रो	१	-२३२	–
पिपुल्स पावर	-२२	८३	–
समलिङ पावर कम्पनी	-४९	११३	–
माई खोला हाइड्रोपावर	-६३	५६	–
खानी खोला हाइड्रोपावर	-६९	-१६९	–
दरम खोला हाइड्रोपावर	-८५	२७२	–
लिबर्टी इनर्जी कम्पनी	-८७	-३०९	–
हिमस्टार ऊर्जा कम्पनी	-१०८	०.०५	–
थ्रिस्टार हाइड्रोपावर	-११३	६७	–
घलेम्दी हाइड्रोपावर	-१७०	-१६	–
जोशी हाइड्रोपावर डेभलपमेन्ट कम्पनी	-२१९	-७५	–
शिभश्री हाइड्रोपावर	-२२९	-६१५	–
एसियन हाइड्रोपावर	-२८९	-१०४	–
हिमाल दोलखा हाइड्रोपावर	-६०४	-३६३	–
मोदी इनर्जी	-६२४	-३३५	–
त्रिशुली जलविद्युत कम्पनी	-६२५	-८०	–
भिजन लुम्बिनी ऊर्जा कम्पनी	-८३२	२६३	–
रसुवागढी हाइड्रोपावर	-१०८१४	-३२८	–
कुल	७०१३७	३४६००	१०२.७१

यो वर्ष ६ महिनामा ७८ कम्पनीले नाफा वृद्धि गरेका छन्। अपर तामाकोशीले सबैभन्दा धेरै ९९ करोड ६५ करोड रुपैयाँ खुद नाफा कमाएको छ। कम्पनी पोहोर दोस्रो त्रैमासमा ८२ करोड ११ लाख रुपैयाँ नोक्सानीमा थियो।

साहस ऊर्जाले नाफा २७ प्रतिशतले बढाएर ९० करोड ४८ लाख रुपैयाँ पुर्‍याएको छ।

रसुवागढी हाइड्रोपावर भने सबैभन्दा धेरै १ अर्ब ८ करोड रुपैयाँ नोक्सानीमा गएको छ। गत असार अन्तिम साता बाढीले क्षति पुगेको रसुवागढी हाइड्रोपावर चार महिनापछि आंशिक सञ्चालनमा आएको थियो।

The post हाइड्रोपावर कम्पनीलाई विद्युत उत्पादन बढ्दा घटेको ब्याजदरको पनि साथ, नाफामा १०३% उछाल appeared first on BIZMANDU.