मनाङ। प्रतिनिधिसभा सदस्य निर्वाचन नजिकिँदै गर्दा मनाङका केही मतदान केन्द्रको अनुगमन हुन सकेको छैन ।

हालै भएको हिमपातका कारण विशेष गरी नार्पाभूमि गाउँपालिकाका मतदान केन्द्रमा पुग्न समस्या भएको प्रमुख जिल्ला अधिकारी नवराज पौड्यालले बताए । भौगोलिक अवस्था र चिसोका कारण अनुगमन प्रभावित भएको उनले बताए ।

उनका अनुसार मनाङ ङिस्याङ गाउँपालिकाका नौवटै मतदान केन्द्रको अनुगमन गरिएको छ । चामे र नासोँ गाउँपालिकाका मतदान केन्द्रको यसअघि नै अनुगमन भए पनि नार्पाभूमिका केन्द्रमा पुग्न सकिएको छैन ।

सदरमुकाम चामेबाट नार्पाभूमिका मतदान केन्द्र पुग्न पैदल दुई दिन लाग्छ । नार्पाभूमि गाउँपालिकाको नार क्षेत्रमा तीन र फू क्षेत्रमा दुई गरी पाँच मतदान केन्द्र रहेका छन् ।

आवागमनमा समस्या भएपछि अस्थायी रूपमा मतदान केन्द्र सदरमुकाम सार्ने विषयमा स्थानीय तहसँग छलफल भइरहेको प्रमुख जिल्ला अधिकारी पौड्यालले बताए ।

नार्पाभूमि गाउँपालिकामा ४८८ मतदाता छन् । जिल्ला निर्वाचन अधिकारी जीवन कुँवरका अनुसार मौसमका कारण उत्पन्न अवस्थाबारे आवश्यक निर्णयका लागि छलफल भइरहेको छ ।

जिल्लामा तीन हजार ६२३ महिला र तीन हजार ३७७ पुरुष गरी कुल सात हजार मतदाता छन् । अघिल्लो निर्वाचनको तुलनामा यसपटक २२१ मतदाता थपिएका छन् ।

मनाङ एकमात्र निर्वाचन क्षेत्र रहेको जिल्ला हो । यहाँ प्रतिनिधिसभा सदस्यका लागि नेपाली कांग्रेसका टेकबहादुर गुरुङ, नेकपाका यशोदा सुवेदी गुरुङ र मङ्गोल नेसनल अर्गनाइजेसनका रामबहादुर गुरुङ प्रतिस्पर्धामा छन् ।