पूर्वराष्ट्रपति विद्यादेवी भण्डारीले अनुभव नभएका नयाँ पात्रहरूको राजनीतिक उदयले राष्ट्रिय एकता र सार्वभौमिकतामा गम्भीर प्रश्नचिह्न खडा गरेको बताएकी छन् ।

‘भूमिगत महिला’ नामक पुस्तकमाथिको छलफल कार्यक्रममा बोल्दै उनले राष्ट्रिय स्वतन्त्र पार्टी र प्रधानमन्त्री बालेन शाह प्रति लक्षित गर्दै देशको सार्वभौमिकता प्रति चिन्ता व्यक्त गरेकी हुन् ।

पूर्वराष्ट्रपति भण्डारीले अनुभवी नयाँ पात्र आउनु र अनुभव नभएकाहरू आउनुमा धेरै भिन्नता हुने तर्क गरिन्। उनले भनिन्, ‘अहिले नयाँ पात्रहरूको उदय भएको छ, तर अनुभव नभएका नयाँ पात्रहरूको आगमनले हाम्रो राष्ट्रिय परिस्थिति, एकता र स्वाभिमानमा ठुलो प्रश्न खडा गरेको छ।’

उनले अनुभवविहीन पात्रहरूका कारण देशको सार्वभौमिकता, जनजीविका र नागरिकले प्राप्त गरेका मौलिक हकहरू नै जोखिममा पर्न सक्ने बताइन्। ‘हामीले प्राप्त गरेको मौलिक हक, स्वतन्त्रता र लोकतन्त्रको भविष्य के हुने भन्ने प्रश्न अहिले टड्कारो बनेको छ,’ भण्डारीले थपिन् ।

यस्तो असहज परिस्थितिमा राज्यका सबै अंग र नागरिकहरूको सक्रियता आवश्यक रहेको उनको भनाइ थियो। उनले ३५/३६ साल र ६२/६३ सालको आन्दोलनको स्मरण गर्दै राष्ट्रलाई अप्ठ्यारो परेका बेला महिलाहरूको भूमिका सधैँ अग्रमोर्चामा रहेको उल्लेख गरिन् ।

आफू नेकपा एमालेको भ्रातृ संस्थाको नेतृत्वमा रहँदाको अनुभव सुनाउँदै उनले राजनीतिक दलहरूले महिला सहभागितालाई केवल संख्यामा मात्र सीमित नगरी अर्थपूर्ण बनाउनुपर्नेमा जोड दिइन् ।

पूर्वराष्ट्रपति भण्डारीले बदलिएको राजनीतिक परिवेशमा वरिष्ठ राजनीतिक दल र नेतृत्वले गम्भीर भएर सोच्नुपर्ने बेला आएको समेत बताइन् ।