काठमाडौं। आरएसडीसी लघुवित्तको नाफा घटेको छ। चालु आर्थिक वर्ष तेस्रो त्रैमासमा लघुवित्तको नाफा पोहोर सोही अवधिको तुलनामा ६.०८ प्रतिशतले घटेर ६ करोड ५६ लाख रुपैयाँमा सीमित भएको हो।

पोहोर यसै अवधिमा लघुवित्तले ६ करोड ९८ लाख रुपैयाँ खुद नाफा गरेको थियो।

कर्जा नोक्सानी घटे पनि खुद ब्याज आम्दानी प्रभावित हुँदा नाफा प्रभावित भएको हो। लघुवित्तको खुद ब्याज आम्दानी १३.६५ प्रतिशतले घटेको छ। पोहोर ९ महिनामा १७ करोड ९ लाख रुपैयाँ ब्याज आम्दानी गरेको लघुवित्तले यसपालि ९ महिनामा १४ करोड ७६ लाख ब्याज आम्दानी गरेको छ।

खुद फि तथा कमिशन आम्दानी ३.५० प्रतिशत, कुल सञ्चालन आम्दानी १२.८० प्रतिशत र सञ्चालन मुनाफा ६.६९ प्रतिशत घटेको छ। लघुवित्तको वितरणयोग्य मुनाफा ५ करोड ६७ लाख रुपैयाँ छ।

लघुवित्तको प्रति सेयर आम्दानी ५५ पैसा घटेर ८.४६ रुपैयाँ कायम भएको छ। चैत मसान्तसम्म लघुवित्तको मूल्य आम्दानी अनुपात ८२.९३ गुणा र प्रति सेयर नेटवर्थ १२४.७ रुपैयाँ छ।

१ अर्ब ३ करोड ४० लाख रुपैयाँ चुक्ता पुँजी रहेको लघुवित्तको जगेडा कोषमा २४ करोड ८९ हजार रुपैयाँ सञ्चित छ। ९ महिनामा लघुवित्तले ४ अर्ब ६० करोड ८९ लाख रुपैयाँ सापटीबाट ४ अर्ब ८२ करोड ९२ लाख रुपैयाँ कर्जा लगानी गरेको छ।

लघुवित्तको खराब कर्जा बढेको छ। पोहोर ९ महिनामा ३.१३ प्रतिशत रहेको खराब कर्जा अहिले ३.४६ प्रतिशत पुगेको छ।

The post आरएसडीसी लघुवित्तको नाफा ६.०८ प्रतिशतले घट्यो, खराब कर्जा बढेर कति पुग्यो? appeared first on BIZMANDU.