काठमाडाैँ । स्याङ्जामा लागूऔषधसहित दुई जना पक्राउ परेका छन् । जिल्ला प्रहरी कार्यालय स्याङ्जाका अनुसार फागुन ७ गते राति करिब १० बजे विशेष सूचनाका आधारमा जिल्ला प्रहरी कार्यालय, वडा प्रहरी कार्यालय वालिङ र प्रहरी चौकी दहथुमबाट खटिएको टोलीले भीरकोट नगरपालिका वडा नं. ४ छ्याङ्छाड्दीस्थित सिद्धार्थ राजमार्गमा चेकजाँच गरेको थियो।

चेकजाँचको क्रममा वालिङतर्फबाट भीरकोटतर्फ आउँदै गरेको ग. २३ प. ४०४२ नम्बरको स्कूटरमा सवार दुईजनाको साथबाट ब्राउन सुगर जस्तो देखिने ३ ग्राम खैरो पदार्थ फेला परेको थियो। पक्राउ पर्नेमा वालिङ नगरपालिका वडा नं. ८ बस्ने ३६ वर्षीय रोशन परियार र ३४ वर्षीय पुकार लोहनी रहेका छन्।

बरामद पदार्थ र स्कूटरसहित पक्राउ परेका दुबैजनाविरुद्ध लागूऔषधसम्बन्धी मुद्दामा थप अनुसन्धानका लागि आज स्याङ्जा जिल्ला अदालतबाट ७ दिन म्याद थप अनुमति प्राप्त गरिएको छ। जिल्ला प्रहरी कार्यालयले आगामी दिनमा थप अनुसन्धान गरी आवश्यक कारबाही अगाडि बढाउने जनाएको छ।