काठमाडौं । फ्रान्सेली रक्षामन्त्री क्याथरिन भोइटखाले बेल्जियम, नेदरल्यान्ड्स र फ्रान्सजस्ता युरोपेली देशसँग होर्मुज स्ट्रेटमा बिच्छ्याइएको बारुदी सुरुङ हटाउने क्षमता रहेको बताएकी छिन्। उनले भनिन्, ‘युरोपले होर्मुज सुरक्षित मार्ग सुनिश्चित गर्न मद्दत गर्न सक्छ।’

भोइटखाका अनुसार युरोपसँग होर्मुज समुद्रीमार्गबाट जहाजहरुको सुरक्षित मार्ग सुनिश्चित गर्न पूर्ण रुपमा रक्षात्मक र गैरआक्रामक तरिकाले जहाजहरुलाई एस्कर्ट र सुरक्षा गर्ने क्षमता छ। ‘यसबारे आज पेरिसमा छलफल गरिनेछ’, उनले भनिन्।

फ्रान्स र बेलायतले आज लगभग ४० देशको बैठक आयोजना गर्दैछन्। बैठकको उद्देश्य होर्मुजमा नेभिगेसनको स्वतन्त्रता पुनस्र्थापित गर्न भूमिका खेल्न आफ्नो तत्परता प्रदर्शन गर्नु हो।

अमेरिका र इजरायलको आक्रमणको प्रतिक्रियामा इरानले यो महत्वपूर्ण जलमार्ग प्रभावकारी रुपमा बन्द गरेको छ। प्रतिक्रियामा अमेरिकाले इरानी बन्दरगाहहरुमा नाकाबन्दी सुरु गरेको छ। जसले विश्वव्यापी ऊर्जा मूल्य बढाएको छ।

इरान युद्ध सुरु हुनुभन्दा अघि विश्वको तेल र ग्यास आपूर्तिको लगभग २० प्रतिशत होर्मुजबाट हुने गरेको थियो। –एजेन्सी