काठमाडौँ- इजरायल र लेबनानबीच १० दिनका लागि युद्धविराम लागू भएको छ। यसबाट पश्चिम एसियामा तनाव कम हुने आशा जगाएको अन्तर्राष्ट्रिय सञ्चारमाध्यमले जनाएका छन्।

युद्धविराम लागू हुनेबित्तिकै बेरुतका केही भागमा उत्सव मनाइएको छ। तर अवस्था चाँडै नै संवेदनशील देखिन थाल्यो। लेबनानी सेनाले युद्धविरामपछि पनि इजरायली सेनाले दक्षिणी लेबनानका केही क्षेत्रमा गोलाबारी गरेको आरोप लगाएको छ। हिज्बुल्लाहले आफ्नो अन्तिम आक्रमण युद्धविराम लागू हुनुभन्दा केही मिनेटअघि भएको जनाएको छ। इजरायलतर्फबाट यी आरोपहरूबारे तत्काल कुनै प्रतिक्रिया आएको छैन।

यसैबीच अमेरिकी राष्ट्रपति डोनाल्ड ट्रम्पले अमेरिका र इरानबीच अर्को चरणको वार्ता सप्ताहन्तमा हुन सक्ने र दुवै पक्ष कुनै सहमतिनजिक पुगेको बताएका छन्। ट्रम्पका अनुसार इरानले २० वर्षसम्म परमाणु हतियार नबनाउने संकेत दिएको छ। इरानले आफ्नो उच्च स्तरमा समृद्ध युरेनियमको भण्डारको केही हिस्सा देशबाहिर पठाउने विषयमा विचार गरिरहेको छ भने अमेरिका प्रतिबन्धहरू खुकुलो पार्ने प्रस्ताव अघि सारिरहेको छ।