काठमाडौँ । वैदेशिक रोजगारीका लागि अमेरिका पठाउने भन्दै रकम ठगी गर्ने एक जना पक्राउ परेका छन् । आकर्षक तलबको प्रलोभनमा पारेर अमेरिका पठाउने भन्दै दुई लाख ५५ हजार ठगी गर्ने २४ वर्षीय सुजन आले मगर पक्राउ परेका हुन् ।

आलेको स्थायी ठेगाना धादिङ जिल्ला निलकण्ठ नगरपालिका वडा नं. १३ हो भने हाल उनी ललितपुर महानगरपालिका वडा नं. ४ बस्दै आएका छन् । उनलाई पीडितले दिएको उजुरीको आधारमा काठमाडौँ उपत्यका अपराध अनुसन्धान कार्यालयबाट खटिएको प्रहरी टोलीले पुस ६ गते काठमाडौँ महानगरपालिका वडा नं. ११ बाट पक्राउ गरेको हो ।

उनले एक जना व्यक्तिबाट सो बराबरको रकम ठगी गरी सम्पर्क विहीन भएका थिए । आलेलाई थप अनुसन्धान तथा आवश्यक कारवाहीका लागि वैदेशिक रोजगार विभाग पठाईएको प्रहरीले जनाएको छ ।