काठमाडौं । भारतको तमिलनाडुस्थित तिरुवल्लुर जिल्लाबाट एउटा चकित पार्ने आपराधिक घटना बाहिर आएको छ। त्यहाँ प्रहरीले सर्पको डसाइबाट एक सरकारी कर्मचारीको मृत्युलाई हत्या घोषित गरेको हो। प्रहरी अनुसन्धानले मृतकका आफ्नै छोराहरुले लगभग भारु ३ करोडको बीमा रकम हात पार्न यो भयानक षड्यन्त्र रचेको खुलासा गरेको छ।

प्रहरीका अनुसार सरकारी विद्यालयमा प्रयोगशाला सहायक ५६ वर्षीय गणेशनलाई अक्टोबर २२ मा उनको घरमा सर्पले डसेको थियो र उनलाई अस्पताल लगिएको थियो। अस्पतालमा डाक्टरहरुले उनलाई मृत घोषित गरेका थिए। सुरुमा यसलाई सामान्य सर्पको टोकाइ मानिएको थियो र प्रहरीले मुद्दा दर्ता गरेको थियो।

भारतीय सञ्चार माध्यमहरुका अनुसार अनुसन्धानका क्रममा धेरै तथ्यहरु देखा परे। जसले प्रहरीलाई शंका बढायो। सामान्यतया सर्पको डसाइको अवस्थामा तुरुन्तै प्राथमिक उपचार प्रदान गरिन्छ र बिरामीलाई नजिकको अस्पताल लगिन्छ। यद्यपि, यस घटनामा गणेशनलाई नजिकैको स्वास्थ्य केन्द्रमा लैजानुको सट्टा उनका छोराहरुले लगभग ४५ मिनेटसम्म एम्बुलेन्सका लागि पर्खे। यो ढिलाइले उनीहरुको मनसायमाथि प्रश्न उठायो।

एउटा गल्तीले रहस्य खुल्यो

अस्पतालको मृत्युको घोषणा भएको १५–२० मिनेटभित्र मृतकका छोराहरुले दाबी प्रक्रियाका बारेमा सोधपुछ गर्न बीमा कम्पनीलाई सम्पर्क गरेपछि प्रहरी झनै शंकास्पद भयो। त्यसपछि डीएसपी जयश्रीको नेतृत्वमा एक विशेष अनुसन्धान टोली (एसआईटी) गठन गरियो।

अनुसन्धानले गणेशनसँग विभिन्न बीमा कम्पनीबाट जम्मा ११ वटा पोलिसी रहेको पत्ता लगायो। जसमध्ये ४ जीवन बीमा थिए। जसको कुल बीमा रकम लगभग भारु ३ करोड थियो। एसआईटीले कागजातहरु, कल विवरणहरु र अन्य प्रमाणहरुको विश्लेषण गर्यो। जसले हत्याको षड्यन्त्र प्रकट गर्यो।

हत्यालाई दुर्घटनाका रुपमा प्रस्तुत गर्ने प्रयास

प्रहरीका अनुसार गणेशनका दुई छोरा मोहनराज र हरिहरनले आफ्ना साथीसँग मिलेर १० दिनअघि यस्तै हत्याको प्रयास गरेका थिए तर बाँचेका थिए। दोस्रोपटक आरोपीहरुले अत्यधिक विषालु सामान्य क्रेट सर्प प्रयोग गरेर पीडितको घाँटीमा डस्न लगाए। घटनालाई दुर्घटना जस्तो देखाउनपछि सर्पलाई घरभित्रै मारिएको थियो।

घटनामा संलगन दुई छोरासहित ६ जनालाई प्रहरीले पक्राउ गरी कारागार चलान गरेको छ।