नेपाल कम्युनिष्ट पार्टी (एमाले)का तर्फबाट स्याङ्जा निर्वाचन क्षेत्र नम्बर २ बाट प्रतिनिधिसभा सदस्यका लागि उम्मेदवारी दिएका खिमबहादुर थापाले आफ्नो प्रतिबद्धता पत्र सार्वजनिक गरेका छन् । उम्मेदवारका रूपमा थापाले सुशासन, पूर्वाधार र कृषिलाई मुख्य प्राथमिकतामा राखेका छन् ।

उनले विद्यार्थी जीवनदेखि नै राजनीतिक, सामाजिक र आर्थिक क्षेत्रमा सक्रिय रहँदै आएको उल्लेख गर्दै पछिल्ला वर्षहरूमा युवाले उठाएको सुशासनको मुद्दालाई पहिलो प्राथमिकतामा राख्ने बताएका छन् । भ्रष्टाचारविरुद्ध शून्य सहनशीलता अपनाउने, सरकारी निकायमा हुने ढिलासुस्ती अन्त्य गर्ने र सेवा प्रवाहलाई प्रभावकारी बनाउने उनको प्रतिबद्धता पत्रमा उल्लेख छ ।

कृषि तथा पशुपालनमार्फत स्वरोजगार सृजना गर्ने योजना पनि उनले अघि सारेका छन् । कालीगण्डकी, आँधीखोला, लुब्दिखोला, ज्याग्दीखोला, मिर्दिखोला, पाठखोला र बायँखोलालगायतका उर्वर फाँट तथा टार क्षेत्रको सदुपयोग गर्दै कृषकलाई व्यावसायिक बनाउने लक्ष्य उनले राखेका छन् । सहुलियत ऋण, प्राविधिक सहयोग र व्यवस्थित बजार व्यवस्थापनमार्फत कृषकको आम्दानी वृद्धि गर्ने योजना सार्वजनिक गरिएको छ ।

पूर्वाधारतर्फ उनले प्रत्येक पालिकामा व्यावसायिक शिक्षालाई प्रवर्द्धन गर्दै सामुदायिक विद्यालयलाई प्रविधिमैत्री बनाउने, ‘एक निर्वाचन क्षेत्र–एक सुविधा सम्पन्न अस्पताल’ स्थापना गर्ने र ‘एक पालिका–एक उद्योग’ अवधारणा कार्यान्वयन गर्ने बताएका छन् । ग्रामीण कच्ची सडक स्तरोन्नति तथा कालोपत्रे, करिडोर तथा अन्तरपालिका–अन्तरजिल्ला सडक विस्तार, सिद्धार्थ राजमार्गको स्तरोन्नति र आँधीखोला हाईड्याम निर्माणजस्ता योजना पनि उनको प्राथमिकतामा छन् ।

धार्मिक तथा सांस्कृतिक पर्यटन प्रवर्द्धनमा जोड दिँदै राम्दीदेखि देवघाटसम्म जल यातायात सञ्चालनको सम्भाव्यता अध्ययन गर्ने उल्लेख गरिएको छ । बहुजातीय तथा बहुसांस्कृतिक पहिचान रहेको क्षेत्रमा खस, आदिवासी जनजाति, दलित र अल्पसंख्यक समुदायको भाषा, भेषभूषा र परम्परा संरक्षणका लागि राष्ट्रिय स्तरमा समन्वय गर्ने प्रतिबद्धता पनि उनले जनाएका छन् ।

युवालाई लक्षित गर्दै प्रत्येक वडामा व्यायाम केन्द्र स्थापना र बहुउद्देश्यीय रंगशाला निर्माण गर्ने योजना सार्वजनिक गरिएको छ ।

दुग्ध विकास संस्थाको कार्यकारी र कालीगण्डकी गाउँपालिकाका पूर्व अध्यक्षका रूपमा काम गरिसकेका थापाले आफूलाई इमान्दार र जनमुखी प्रतिनिधिका रूपमा प्रस्तुत गर्दै यसपटक विकास र सुशासनलाई मूर्त रूप दिने दाबी गरेका छन् ।