मकवानपुर । उज्यालो नेपाल पार्टीका तर्फबाट मकवानपुर क्षेत्र नम्बर–१ मा प्रतिनिधिसभा सदस्य पद उम्मेदवार सुरेन्द्र लामाले गाँजा खेतीबारे आफ्नो धारणा स्पष्ट पारेका छन् ।

चुनावी प्रचारप्रसारलाई औपचारिक रूपमा अगाडि बढाउँदै उनले कानुनविपरीत कुनै पनि गतिविधिलाई समर्थन नगर्ने बताएका हुन् । ‘जबसम्म कानुनले अनुमति दिँदैन, म गाँजा खेतीको पक्षमा उभिन्नँ,’ उनले भने, ‘कानुन संशोधनको विषय संसदको प्रक्रियाबाट मात्रै अघि बढ्न सक्छ ।’

केही उम्मेदवारहरूले वैज्ञानिक रूपमा गाँजा खेती गर्न दिने आश्वासन दिइरहेको प्रसंग उल्लेख गर्दै लामाले आफू झुटा आश्वासन नदिने दाबी गरे । उनका अनुसार गाँजा खेतीको विषयभन्दा पहिला क्षेत्रका आधारभूत समस्या समाधान प्राथमिकतामा पर्नुपर्छ ।

लामाले आफ्नो मुख्य एजेन्डा स्वास्थ्य सेवा सुदृढीकरण, खानेपानी समस्या समाधान र सडक तथा अन्य पूर्वाधार विकास रहेको बताए । ‘हाम्रो क्षेत्रमा स्वास्थ्य र खानेपानीका समस्या गम्भीर छन् । यी विषयमा दीर्घकालीन समाधानका लागि आवश्यक बजेट ल्याउन संसदमा पहल गर्नेछु,’ उनले भने ।

उनका अनुसार प्रतिनिधिसभा सदस्यको मुख्य दायित्व नीति निर्माण र जनताको आवाज संसदमा उठाउनु हो । ‘विकासका काम स्थानीय तहसँग समन्वय गरेर अघि बढाउनुपर्छ, तर आवश्यक नीति र बजेट सुनिश्चित गर्न संसदमा दृढ रूपमा उभिनेछु,’ उनले स्पष्ट पारे ।

मतदातासँग भोट माग्ने आधारबारे उनले विकास, पारदर्शिता र कानुनी शासनलाई प्राथमिकता दिएको बताए । ‘समस्या समाधान गर्न सकेन भने जनताले मलाई अस्वीकार गर्न सक्छन्,’ उनले भने, ‘तर म इमान्दार प्रयास गर्ने प्रतिबद्धता जनाउँछु ।’

निर्वाचनमा आफ्नो जित्ने सम्भावनाबारे उनले माहोल सकारात्मक रहेको दाबी गरे। गाउँ–गाउँमा राम्रो समर्थन पाइरहेको उल्लेख गर्दै उनले आगामी दिनमा घरदैलो कार्यक्रमलाई तीव्र बनाउने बताए।