धनगढी। कैलालीको अत्तरिया क्षेत्रमा दुई मोटरसाइकल एकआपसमा ठोक्किँदा तीन जनाको मृत्यु भएको छ भने एक जना घाइते भएका छन् । दुर्घटना शुक्रबार साँझ धनगढी–डडेल्धुरा (भीमदत्त) राजमार्गअन्तर्गत वनदेवी सडकखण्डमा भएको हो ।

इलाका प्रहरी कार्यालय मालाखेतीका अनुसार दुर्घटनामा गम्भीर घाइते भएका तीन जनाको उपचारका लागि धनगढी लैजाँदै गर्दा मृत्यु भएको हो ।

मृत्यु हुनेमा सुप प्र०१–०१० प ३१८७ नम्बरको मोटरसाइकल चालक धनगढी उपमहानगरपालिका–२ का २२ वर्षीय हरिश ओली, सुप प्र०१–००९ प ७७८१ नम्बरको मोटरसाइकल चालक गोदावरी नगरपालिका–१ का अन्दाजी २६ वर्षीय योगेन्द्र शाह र सोही मोटरसाइकलमा सवार अन्दाजी २३ वर्षीय हरिश पार्की रहेका छन् ।

दुर्घटनामा सुप प्र०१–०१० प ३१८७ नम्बरकै मोटरसाइकलमा सवार गोदावरी नगरपालिका–६ लालपुरका २३ वर्षीय जीवन पाठक घाइते भएका छन् । उनको उपचार भइरहेको छ ।

प्रहरीका अनुसार मोटरसाइकल उच्च गतिमा रहेकाले ठक्करपछि पाङ्ग्रा र अन्य पाटपुर्जा टाढासम्म उछिट्टिएको पाइएको छ । प्रारम्भिक अनुमानमा तीव्र गतिका कारण दुर्घटना भएको देखिएको छ ।

मृतक हरिश ओली गोदावरीमा एक विवाह कार्यक्रममा सहभागी भएर धनगढीतर्फ फर्किँदै गर्दा दुर्घटना भएको प्रहरीको भनाइ छ । घटनाबारे थप अनुसन्धान भइरहेको छ ।