पोखरा — राष्ट्रिय स्वतन्त्र पार्टी (रास्वपा)ले फागुन १० गते पोखरामा गर्ने भनेको सभा अचानक स्थगित गरेको छ ।

भेलामा रास्वपा सभापति रवि लामिछाने, वरिष्ठ नेता बालेन्द्र शाहसहित प्रदेश अन्तर्गत जिल्लाका रास्वपाका ऊमेदवारले सम्बोधन गर्ने कार्यक्रमको तयारी थियो ।

शुक्रबार केन्द्रीय समितिका उपसभापति डोलप्रसाद अर्यालले परिवर्तन उद्घोष कार्यक्रम स्थगित गरिएको जानकारी पत्र पठाएका छन् । केन्द्रबाट पठाइएको पत्रमा ‘संगठनात्मक प्राथमिकता निर्धारण तथा रणनैतिक व्यवस्थापनलगायतका विशेष कारण ऊक्त कार्यत्रम हालका लागि स्थगित गर्ने निर्णय गरिएको’ उल्लेख छ ।

रास्वपाको शुक्रबार दाङमा चुनावी सभा जारी छ । भैरहवामा शनिबार तयारी गरिएको चुनावी सभा पनि अचानक स्थगित भएको छ ।

दुवै नेताको स्वागतका लागि बसेका रास्वपा कार्यकर्ताले बिहीबार राति दाङमा एमालेको चुनाव चिन्ह सूर्य अंकित झण्डा जलाएका थिए । एमालेले त्यसको केन्द्रदेखि जिल्लासम्म कडा प्रतिवाद गरिरहेको छ । त्यसको असर रूपन्देही सभामा देखिनसक्ने जोखिम भएकाले केन्द्रदेखि नै सभा स्थगितको निर्णय भएको स्थानीय एक नेताले बताए ।

रास्वपाले लुम्बिनी प्रदेशको दाङको सभालाई शुक्रबार सम्बोधन गरेर रास्वपाका सभापति लामिछाने र वरिष्ठ नेता शाह भैरहवाको सभालाई सम्बोधन गर्न आइपुग्ने तालिका बनाएको थियो । तर, वरिष्ठ नेता शाह अस्वस्थ भएको भन्दै बिहीबार सुर्खेतको सभाबाटै काठमाडौं फर्किएका छन् ।

दुवै नेताले आफ्ना उमेदवार बिजयी गराउने आन्तरिक प्रयाससँगै सामूहिक सन्देश दिनका लागि पनि भैरहवा, पोखरामासभा आयोजना गरिएको भए पनि अन्तिम समयमा अस्वभाविक तरिकाले सभा स्थगित गरिएको रास्वपाले जनाएको छ ।