काठमाडौं। पशुपतिनाथ मन्दिर परिसरमा एक युवकको हत्या भएको घटनामा प्रहरीले एक भारतीय नागरिकसहित दुई जनालाई पक्राउ गरेको छ ।

फागुन ६ गते राति पशुपति–१५ स्थित शिवालय मन्दिरको उत्तरतर्फ रहेको दोस्रो मन्दिरभित्र सङ्खुवासभाका २५ वर्षीय सन्तोष गिरी मृत अवस्थामा फेला परेका थिए ।

घटनाको अनुसन्धानका क्रममा प्रहरीले दोलखा वैँतेश्वर गाउँपालिका–२ घर भई हाल भक्तपुर थिमी बस्दै आएका २३ वर्षीय सरोज तामाङ र भारत उत्तर प्रदेश मथुरा घर भई हाल पशुपति क्षेत्रमा बस्दै आएका ४८ वर्षीय नीरज नाथलाई पक्राउ गरेको जनाएको छ ।

प्रहरीका अनुसार मृतक गिरी र नीरज नाथसहितको समूहबीच विवाद भएको थियो । विवादका क्रममा चिम्टालगायतका वस्तुले प्रहार गर्दा गिरीको मृत्यु भएको प्रारम्भिक अनुसन्धानबाट खुलेको छ ।

मृतकको शव परीक्षणका लागि त्रिवि शिक्षण अस्पताल महाराजगन्जमा राखिएको छ । घटनाबारे थप अनुसन्धान भइरहेको प्रहरीले जनाएको छ ।