एजेन्सी – बायर्न म्युनिखले रियल म्याड्रिडलाई समग्रमा ६-४ ले हराउँदै युइएफए च्याम्पियन्स लिगको सेमिफाइनलमा पुगेको छ।‌

दोस्रो लेगमा बायर्नले ४-३ को रोमाञ्चक जित निकाल्दा खेलको निर्णायक मोड एडुआर्डो कामाभिङ्गाको रातो कार्ड बन्यो।

खेल सुरु भएको मात्र ६ मिनेटभित्रै दुवै टोलीले गोल गरेका थिए। गोलकिपर मानुएल नोएर र आन्द्रेई लुनिनका गल्तीपछि दुवै टोलीले गोल गरे र त्यसपछि पहिलो हाफ ५ गोलसहित निकै रोमाञ्चक बन्यो।

आर्डा गुलरले दुई गोल गरे । किलियन एमबाप्पे पनि गोल गरे। यता बायर्नका लागि हेरी केनले गोल गरेपछि पहिलो हाफ सकिँदा समग्र स्कोर ४–४ को बराबरीमा पुगेको थियो।

तर खेलको निर्णायक क्षण परिवर्तित कामाभिङ्गाले समय खेर फाल्ने क्रममा दोस्रो पहेंलो कार्ड पाएर मैदान छाड्दा रह्यो। त्यसपछि अन्तिम समयमा लुइस डियाज र माइकल ओलिसेले गोल गर्दै बायर्नलाई जित दिलाए। अब बायर्नले सेमिफाइनलमा पेरिस सेन्ट जर्मेन (पिएसजी) सँग खेल्नेछ।

पहिलो लेगमा बनाएको अग्रता बायर्नले केवल ३५ सेकेन्डमै गुमायो। नोएरको कमजोर पास सिधै गुलरसम्म पुगेपछि उनले करिब ३० यार्डबाट पहिलो टचमै खाली पोस्टमा गोल गरे।

तर छैटौं मिनेटमा समयमै बायर्नले बराबरी गोल फर्कायो। जोशुआ किमिचको कर्नरमा गोलकिपर आन्द्रेई लुनिन लाइनभित्र अड्किँदा अलेक्जान्दर पाभलोभिचले नजिकैबाट हेडर गोल गरे।

२९औँ मिनेटमा आर्डा गुलरले २५ यार्ड टाढाबाट फ्रि‌ किकमा सान गोल गर्दै रियललाई पुनः अग्रता दिलाए।
त्यसपछि बायर्नले पनि उत्कृष्ट प्रतिक्रिया दियो। ३८ औं मिनेटपछि केनले गोल गर्दै खेल बराबरीमा ल्याए।

पहिलो हाफको अन्त्यतिर भिनिसियस जुनियरको प्रहार क्रसबारमा लाग्यो। त्यसपछि उनले नै पास दिँदा किलियन एमबाप्पेले ४२औँ मिनेटमा गोल गर्दै रियललाई ३-२ अग्रता दिलाए।

दोस्रो हाफमा पनि दुवै टोलीले आक्रमण जारी राखे। माइकल ओलिसेका दुई प्रहार झिनो अन्तरले बाहिरिए भने लुइस डियाजले पनि केही अवसर गुमाए। उता नोएरले किलियन एमबाप्पेको नजिकबाट आएको प्रहार बचाए।

खेल सकिन चार मिनेट बाँकी रहँदा कामाभिङ्गाले फ्रि किक रोक्न बल उठाएपछि दोस्रो पहेंलो कार्ड पाएर रातो कार्डको सामना गरे । त्यसले रियललाई ठूलो झट्का दियो।

त्यसको ८९ औं मिनेटपछि डियाजको २० यार्डको प्रहार एडर मिलिटाओमा लागेर गोल‌ भयो। इन्जुरी समयको‌ चौथो मिनेटमा ओलिसेले बायर्नका लागि चौथो गोल गरे। खेल सकिएपछि रेफ्रीसँग विवाद गरेपछि आर्डा गुलर पनि रातो कार्ड पाउने दोस्रो रियल खेलाडी बने।

गुलरको पहिलो गोल च्याम्पियन्स लिगमा रियलका लागि सबैभन्दा छिटो गोल बन्यो। यसअघि यो कीर्तिमान गारेथ बेलले २०१६ मा बनाएका थिए।

पहिलो हाफमा ३ गोल खाएको बायर्नका लागि यस्तो घटना २०१४ पछि पहिलो पटक थियो, त्यो पनि रियल विरुद्ध नै भएको थियो।

यसै क्रममा केनले युरोपका शीर्ष पाँच लिगका खेलाडीमध्ये एक सिजनमा ५० गोल गर्ने कीर्तिमान बनाए। जुन पछिल्लोपटक एर्लिङ हालान्डले २०२२–२३ सिजनमा गरेका थिए। किलियन एमबाप्पे भने एउटै च्याम्पियन्स लिग अभियानमा १० अवे गोल गर्ने पहिलो खेलाडी बने।

आर्सनल अन्तिम चारमा

आर्सनलले बुधबार घरेलु मैदानमा गोलरहित बराबरी खेल्दै स्पोर्टिङ सिपीविरुद्ध समग्रमा १-० को जितसहित च्याम्पियन्स लिगको सेमिफाइनलमा पुगेको छ।

पहिलो लेगमा काइ हाभर्ट्जले अन्तिम समयमा गरेको गोल नै निर्णायक बन्यो। यो जितसँगै आर्सनलले अब सेमिफाइनलमा एट्लेटिको म्याड्रिडसँग प्रतिस्पर्धा गर्नेछ।

खेलको सुरुवातमै फ्रान्सिस्को त्रिन्काओको प्रहार झिनो अन्तरले बाहिरियो। यो अवसर मोर्तेन ह्युलमाण्डले विलियम सालिबाको गल्तीबाट बल जितेपछि बनेको थियो। त्यसपछि भिक्टर ग्योकेरेसले गरेको घुमाउरो प्रहार गोलकिपर रुई सिल्भाको बारमाथिबाट बाहिर गयो।

पहिलो हाफको अन्त्यतिर स्पोर्टिङ अग्रता लिन निकै नजिक पुगेको थियो। म्याक्सी अराउजोको पासमा जेनी कातामोले गरेको भली पोस्टमा लागेर फर्कियो। यसअघि केही मिनेटमै गोलकिपर डेभिड रायको गल्तीले स्पोर्टिङलाई अवसर मिल्ने सम्भावना बनेको थियो।

दोस्रो हाफमा पनि स्पोर्टिङले दबाब कायम राख्यो। म्याक्सी अराउजोको अर्को प्रहार लक्ष्यभन्दा बाहिरियो। आर्सनलका गेब्रियल मार्टिनेलीको हाफ भली बारमाथि गयो भने नोनी माडुकेको प्रहार साइड नेटिङमा लाग्यो।

स्पोर्टिङले त्यसपछि पेनाल्टीको माग पनि गरेको थियो। उनीहरूले क्रिस्थियन मोस्केराले अराउजोलाई पछाडिबाट धकेलेको दाबी गरे पनि रेफ्रीले त्यो अपिल अस्वीकार गरे। खेल सकिन करिब १० मिनेट बाँकी हुँदा परिवर्तित काइ हाभर्ट्जले ब्याकहिलबाट गोल गर्ने प्रयास गरे पनि सफल भएनन्।

अन्त्यतिर लिएन्ड्रो ट्रोसार्डले म्याक्स डाउम्यानको कर्नरमा हेड गर्दा बल पोस्टमा लाग्यो। इन्जुरी समयमा जोआओ सिमोएसले शक्तिशाली प्रहार गरे पनि बल गोलपोस्टको दायाँ भागबाट बाहिरियो र आर्सनलले आफ्नो अग्रता जोगाउँदै सेमिफाइनल यात्रा कायम राख्यो।

The post बायर्न सेमिफाइनलमा, रियल स्तब्ध first appeared on हाम्रो खेलकुद.