माेरङ –साविक उपविजेता चर्च ब्वाईज युनाइटेडलाई ३ शुन्यले स्तब्ध बनाउँदै विराटनगरको सम्राट स्पोर्टिंग क्लब विराट गोल्डकपको फाइनलमा प्रवेश गरेको छ। सहिद मैदानमा जारी गोल्डकप अन्तर्गत बिहीबार राति भएको दोस्रो सेमीफाइनलमा मोरङ लिग विजेता सम्राटले ए डिभिजन लिग विजेता टोली चर्च ब्वाईजको चुनौति सहजै पाखा लगाएको हो।

जितसंगै विराट गोल्डकपमा पहिलोपटक सहभागिता जनाएको सम्राट स्पोर्टिंग क्लबले शनिबार हुने फाइनलमा झापा एघारको सामना गर्नेछ। चर्च ब्वाईजलाई निराश बनाउने क्रममा सम्राटका सौरभ तामाङ, आदित्य शाक्य र विवेक राईले १–१ गोल गरेका थिए। रोमान्चक बनेको खेलमा घरेलु टोली सम्राटले खेलको सुरुवातबाट चर्च ब्वाइजमाथि दबाव बनाएको थियो। दबाव बनाउने क्रममा सम्राटले पहिलो हाफमा गोलका केही राम्रा अवसरहरु गुमाएको थियो।

पहिलो हाफ गोलरहित सकिएपनि दोस्रो हाफमा प्रशिक्षक पारस चौधरीको आक्रमक रणनीतिसंगै सम्राटले चर्च ब्वाईजलाई थप दबावमा राख्यो। खेलको ५० औं मिनेटमा सम्राटका लागि सौरभ तामाङले गोल गर्दै अग्रता दिलाए। निर्धारित ९० मिनेटको खेलमा एक शुन्यले पछि परेको चर्च ब्वाईज थप गरिएको ७ मिनेटको समयमा सम्हालिन सकेन। जसको फाइदा सम्राटले लिएको थियो। निर्धारित समयको खेलपछि थप गरिएको ७ मिनेटमा सम्राटका लागि आदित्य शाक्य र विवेक राईले गोल गर्दै टोलीको जित सुनिश्चित बनाए।

सम्राटले यसअघि क्वाटरफाइनमा भारतको विर्सामुण्डा स्पोट्र्स एकेडेमीलाई ३–१ ले पराजित गरेको थियो। अर्कोतर्फ, झापा–११ ले नेपाल पुलिस र त्रिभुवन आर्मीलाई पाखा लगाउँदै फाइनल पुगिसकेको छ। प्रतियोगिताको विजेताले ११ लाख र उपविजेताले ५ लाख रुपैयाँ नगद पुरस्कार प्राप्त गर्ने आयोजक विराट गोल्डकप फुटबल ट्रष्टका प्रवक्ता धनकुमार लामाले जानकारी दिए।उनका अनुसार शनिबार हुने फाइनलमा प्रतिनिधि सभाका सभामुख डोलप्रसाद अर्याल प्रमुख अतिथिका रुपमा आउने प्रवक्ता लामाले जानकारी दिए।