काठमाडौँ – राष्ट्रिय स्वतन्त्र पार्टी (रास्वपा) का सभापति रवि लामिछानेले संसद्‌लाई मर्यादित र सक्रिय ढङ्गले अगाडि बढाउनुपर्ने बताएका छन्।

संसदीय समितिको बैठकपछि सञ्चारकर्मीहरुसँग कुरा गर्दै उनले संसद्को प्रमुख जिम्मेवारी आवश्यक कानून निर्माण र परिमार्जन गर्नु रहेको बताए। उनले विवेकपूर्ण ढङ्गले सदन अगाडि बढ्ने विश्वास व्यक्त गरे।

उनले सभामुखको भूमिका पनि सकारात्मक रहने अपेक्षा राखे। यस वर्ष समाजमा व्याप्त विसङ्गति र बेथितिहरूलाई अन्त्य गर्ने अवसर भएको उनको भनाइ छ।

प्रधानमन्त्री र मन्त्रीहरूको सम्पत्ति अस्वाभाविक भएको भन्ने चर्चाका सन्दर्भमा लामिछानेले सबै सार्वजनिक पदमा रहेका व्यक्तिहरू छानबिनको दायरामा रहेको स्पष्ट पारे।

उनले छानबिन आयोग बनिसकेको र त्यसको कार्यक्षेत्र (टिओआर)भित्र प्रधानमन्त्रीदेखि मन्त्रीहरूसम्म सबै पर्ने बताए।