काठमाडौं । नेपाल ललितकला प्रज्ञा–प्रतिष्ठान र संस्कृति तथा पर्यटन मन्त्रालय, बागमती प्रदेशको आयोजनामा आजदेखि काठमाडौंमा ‘बागमती प्रादेशिक ललितकला प्रदर्शनी तथा सम्मेलन २०८२’ सुरु भएको छ ।

बागमती प्रदेशका संस्कृति तथा पर्यटनमन्त्री सुरेश श्रेष्ठले प्रदर्शनीको उद्घाटन गरे । उनले कला, संस्कृति कहिल्यै नमर्ने बताउँदै नेपालको पहिचान दिलाउन र अर्थतन्त्रमा कला क्षेत्रको योगदान महत्त्वपूर्ण रहेको बताए । मन्त्री श्रेष्ठले प्रतिष्ठानमा बन्दै गरेको कलाकार अरनिकोको मूर्ति तथा पाँचपोखरी थाङ्पालमा निर्माणाधीन ८४ फिट अग्लो बुद्धमूर्ति’bout चर्चा गर्दै यस विषयमा बागमती प्रदेश सरकारका तर्फबाट सक्दो सहयोग गर्ने प्रतिबद्धता जनाए ।

कार्यक्रममा प्रतिष्ठानका कुलपति नारदमणि हार्तम्छालीले समाजको ‘सफ्टपावर’ भनेको कलाकार भएकाले यसको सुरुआत ललितकलाले गरेको र कलाका विषयमा अहिले उपत्यका बाहिर पनि चर्चा–परिचर्चा बढेको बताए । उनले आगामी दिनमा सामाजिक रूपान्तरणमा ललितकलाको अभियानलाई अझ सशक्त बनाउँदै नेपाली माटो चिनाउने कलाको विकास, खोज, अनुसन्धानका क्षेत्रमा विभिन्न कार्यहरू गर्दै जानुपर्ने धारणा राखे ।

प्रतिष्ठानका उपकुलपति तथा बागमती प्रदेश समन्वय समिति संयोजक लालकाजी लामाले प्रादेशिक प्रदर्शनी सुरुआत गरेको प्रसङ्ग उल्लेख गर्दै प्रतिष्ठानले कलाको विकासका लागि जरामा गोडमेल गर्नुका साथै स्थानीय भूगोलमै जोडिएर काम गर्ने प्रयत्न गरेको बताए । उनले ललितकलाको प्रवर्द्धन र विकासमा प्रतिष्ठानले सबैसँग सहकार्य गर्दै अघि बढेको बताए ।

प्रतिष्ठानका सदस्यसचिव देवेन्द्रकुमार काफ्ले ‘थुम्केली’ले स्रष्टा युगको द्रष्टासमेत भएको बताउँदै आगामी दिनको ललितकला इतिहास लेख्ने अहिलेको पुस्ता भएको बताए ।

संस्कृति तथा पर्यटन मन्त्रालय, बागमती प्रदेशका सचिव दीपेन्द्र सुवेदीले देशको पहिचान नै कला–संस्कृतिसँग जोडिएको बताए । उनले बागमती प्रदेश प्रज्ञा–प्रतिष्ठान गठनको कानुनी पाटोको काम भइरहेको बताउँदै यसले छिट्टै सार्थकता पाउने जानकारी गराए । सुवेदीले कला अमूल्य हुने भएकाले यसको सम्मान गर्नुपर्ने धारणा राखे ।

समारोहमा सिद्धिरत्न शाक्य (परम्परागत मूर्तिकला), रामसुन्दर ख्याजु (परम्परागत चित्रकला पौभा), सरिता चित्रकार (लोककला), विश्वम्भर लामिछाने (मूर्तिकला), सिन्धुली कला घर (सिन्धुली), वल्र्ड आर्टलिङ्क (रत्ननगर, चितवन), ई आर्टस् नेपाल (ललितपुर)लाई सम्मान गरिएको थियो ।

प्रदर्शनीको ‘क्युरेटिङ’ प्राज्ञसभा सदस्य सुन्दर सिंखवालको संयोजनमा सविना तामाङ तथा रजनी सिंखवालले गरेकी थिइन् ।

प्रदर्शनीमा बागमती प्रदेशका कलाकारले सृजना गरेका परम्परागत चित्रकला, समसामयिक चित्रकला, समसामयिक मूर्तिकला, परम्परागत मूर्तिकला, शिल्प–हस्तकला, वास्तुकला तथा लोककला, बहुआयामिक तथा अन्य सृजनात्मक कला विधाका २३० भन्दा बढी कलाकृति राखिएका छन् । नेपाल पर्यटन बोर्ड कला प्रवर्द्धक रहेको प्रदर्शनी यही फागुन १२ गतेसम्म सञ्चान हुनेछ ।

The post बागमती प्रादेशिक ललितकला प्रदर्शनी तथा सम्मेलन सुरु appeared first on राजधानी राष्ट्रिय दैनिक (लोकप्रिय राष्ट्रिय दैनिक)-RajdhaniDaily.com - Online Nepali News Portal-Latest Nepali Online News portal of Nepali Polities, economics, news, top stories, national, international, politics, sports, business, finance, entertainment, photo-gallery, audio, video and more....