काठमाडौं । निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले निर्वाचन कार्यतालिका हेरफेर गर्दा झन पेचिलो बन्ने भएकाले परिवर्तन गर्न नसकिने बताएका छन्।

सोमबार सिंहदरबारमा प्रधानमन्त्रीको उपस्थितिमा भएको छलफलमा उनले मतदाता नामावली संकलनमा सयम सिमा थप गर्दा मात्रै पनि पेचिलो बनेको उदाहरण दिँदै निर्वाचन कार्यतालिका हेरफेर गर्न सम्भव नरहेको बताए।

‘यदि समानुपातिक निर्वाचन प्रणलीको उम्मेद्वारको नाम पेस गर्ने समय परिवर्तन गरियो भने त्यो परसम्मको समय धक्का लाग्छ। निर्वाचनको मिति घोषणा भइसकेपछि मतदाता नामावली संकलन गर्न निषेधित थियो हामीले सरकारलाई आग्रह गरेर थप्यौं सयम सिमाले नपुगेर अलिकति अझ थप्दापनि हाम्रा कर्मचारी १५ देखि २० दिन सुत्न पाउनुभएन त्यति पेचिलो बन्यो। अर्को जनशक्ति थपेर गरौं भने पनि सम्भव छैन। विधि र प्रक्रिया जानेको व्यक्तित्व त चाहियो नि हामीलाई त्यसैले खेलको नियम सुरु भएपछि तालिका परिवर्तन नगरौं भन्ने हाम्रो आग्रह छ।’

त्यस्तै, उनले बैठकमा एमालेका केन्द्रीय सचिव महेश बस्नेतले अध्यादेशमा प्रतिनिधिसभाको मतपत्रमा दलहरूको चुनाव चिन्ह गोला प्रथाबाट राखिने भन्ने कुरा आएको भन्दै त्यो स्वीकार्य नहुने धारणा राखेका थिए।

उनलाई उत्तर फर्काउँदै भण्डारीले भने, ‘गोला प्रथाबाट चिन्ह निर्धारण गर्न लाग्यो रे आयोगले भन्ने कुरा पनि आयो। यस्तो रे को कुरामा राजनीतिक दलमा राम्रोसँग प्रतिनिधित्व गर्ने अगुवा व्यक्तिले त्यस्तो कुरा गर्न हुँदैन। त्यो त ऐनमा नै छ त। ऐनमा भएको कुरा आयोगले परिवर्तन गर्न सक्दैन।’