काठमाडौँ- एन आई सी एशिया बैंक लिमिटेडले आफ्नो स्वामित्वमा रहेका विभिन्न सम्पत्तिहरूको लिलाम बिक्री सम्बन्धी विस्तृत जानकारी प्रदान गर्ने उद्देश्यले एक अत्याधुनिक अनलाईन पोर्टल सार्वजनिक गरेको छ ।

बैंकको २८ औं वर्षको अवसरमा ग्राहकहरूलाई सहजता प्रदान गर्न यो डिजिटल प्लेटफर्म सञ्चालनमा ल्याइएको हो । यस पोर्टलमा बैंकको नाममा रहेका बैंकिङ्ग सम्पत्ति, गैर-बैंकिङ्ग सम्पत्ति तथा धितो सुरक्षणमा रहेका सम्पत्तिहरूको लिलाम बिक्री सम्बन्धी सम्पूर्ण विवरणहरू उपलब्ध गराइएको छ ।

ग्राहकले लिलाम बिक्री सम्बन्धी सूचनामा रहेको क्युआर कोड (QR Code) स्क्यान गरी वा सिधै https://auctionassistance.nicasiabank.com लिंक मार्फत पोर्टलमा प्रवेश गर्न सक्नेछन् ।

पोर्टल भित्र लिलाममा रहेका सम्पत्तिहरूको कित्ता नम्बर, क्षेत्रफल, फोटो, र नक्सा जस्ता महत्वपूर्ण जानकारीहरू राखिएका छन् । साथै, सम्पत्तिको वास्तविक अवस्थितिको पहिचान गर्न गुगल म्याप (Google Map) समेत समावेश गरिएको छ, जसले गर्दा खरिदकर्तालाई सम्पत्ति निरीक्षण गर्न थप सहज हुने बैंकको विश्वास छ ।

कुनै पनि सम्पत्ति खरिद गर्न इच्छुक ग्राहकले थप जानकारी आवश्यक परेमा पोर्टलमा उपलब्ध म्यासेज बक्स मार्फत आफ्नो विवरण राखी जिज्ञासा पठाउन सक्ने व्यवस्था समेत गरिएको छ ।

बैंकका सहायक प्रमुख कार्यकारी अधिकृत जयन्द्र रावलका अनुसार, यो पोर्टलमा नियमित रूपमा लिलाम बिक्री हुने सम्पत्तिहरूको सूचना अपडेट गरिनेछ । यस डिजिटल पहलले लिलाम प्रक्रियालाई थप पारदर्शी र सर्वसुलभ बनाउने लक्ष्य लिएको छ ।