काठमाडौं । काठमाडौंस्थित त्रिभुवन अन्तर्राष्ट्रिय विमानस्थलबाट सन् २०२६ को जनवरी महिनामा उल्लेखनीय संख्यामा यात्रु आवागमन भएको छ। विमानस्थल कार्यालयले सार्वजनिक गरेको तथ्यांकअनुसार एक महिनाको अवधिमा कुल ७ लाख ५० हजार १ सय ८३ यात्रुले आन्तरिक तथा अन्तर्राष्ट्रिय उडान सेवा लिएका छन्।

यस अवधिमा अन्तर्राष्ट्रिय यात्रुको संख्या ४ लाख ३१ हजार ६ सय ३५ पुगेको छ भने आन्तरिक यात्रु संख्या ३ लाख १८ हजार ५ सय ४८ रहेको छ। अन्तर्राष्ट्रिय उडानतर्फ २ लाख १० हजार ८ सय ८७ यात्रु काठमाडौंबाट बाहिरिएका छन् भने २ लाख १९ हजार ३ सय ६१ यात्रु विदेशबाट नेपाल भित्रिएका छन्।

आन्तरिक उडानतर्फ भने १ लाख ६२ हजार २ सय ३१ यात्रु प्रस्थान गरेका छन् र १ लाख ५६ हजार ३ सय १७ यात्रु काठमाडौं अवतरण गरेका छन्।

उडान–अवतरण संख्याका आधारमा हेर्दा, आन्तरिकतर्फ हेलिकप्टरसहित २० वायुसेवा कम्पनी सक्रिय रहे। जनवरी महिनाभर आन्तरिक उडानतर्फ कुल ६ हजार ८ सय ९ उडान–अवतरण भएका छन्, जसमध्ये ३ हजार ४ सय ३ प्रस्थान र ३ हजार ४ सय ६ अवतरण रहेका छन्।

त्यसैगरी अन्तर्राष्ट्रिय उडानतर्फ २ हजार ९ सय ४९ उडान–अवतरण भएका छन्। यसमध्ये १ हजार ४ सय ७५ प्रस्थान र १ हजार ४ सय ७४ अवतरण समावेश छन्।

एक महिनामै साढे सात लाखभन्दा बढी यात्रुको आवागमनले हवाई यात्रा गतिविधि पुनः उच्च दरमा चलायमान रहेको संकेत गरेको विमानस्थल स्रोतले जनाएको छ।

The post त्रिभुवन अन्तर्राष्ट्रिय विमानस्थलबाट जनवरीमा ७ लाखभन्दा बढी यात्रु आवागमन first appeared on Tourism Face.