काठमाडौँ। गायक तथा संगीतकार भीषण मुकारुङ राईको एकल गायनमा धरानमा ‘भीषण सांगीतिक साँझ’ गरिएको छ।

भोजपुर-सुनसरी सेवा समाजको भवन निर्माण सहयोगार्थ शनिबार साँझ धरानमा आयोजित कार्यक्रममा भीषणले खोर्सानी डल्ले, अँधेरीमा जुन फुल्दा, चन्द्रमुखीलगायत चर्चित गीत प्रस्तुत गरे।

अर्केस्ट्रा टोलीसहित सांगीतिक प्रस्तुति दिएका भीषणले कार्यक्रमका प्रमुख अतिथि वरिष्ठ गायक दीप श्रेष्ठको सम्मानमा उनकै गीत गाएर कार्यक्रम सुरु गरेका थिए।

कार्यक्रमबाट संकलन भएको रकम समाजको भवन निर्माणमा खर्च गरिनेछ।

ख्यातिप्राप्त गीतकार, कवि तथा उद्योगपति बसन्त चौधरीले जेनजीलाई लक्षित गर्दै गीत सार्वजनिक गरेका छन् ।
नयाँ पुस्ताको सामूहिक आवाजलाई एकै थलोमा उभ्याउँदै जेनजी एन्थमका रुपमा तयार पारिएको गीतले नेपाली संगीत क्षेत्रमा फरक स्वाद र सशक्त सन्देश दिने अपेक्षा गरिएको छ ।

गीतमा शब्द रचना बसन्त चौधरीको छ । संगीत न्ह्यू बज्राचार्यले तयार पारेका छन् । गायनमा भने गंगा सोनाम, दर्शन गन्धर्वी, मृणाल मानन्धर, पित्तु गहतराज, निरज विश्वकर्मा, राज सयामी, जितेन्द्र गुरुङ जिदान, प्रशना धमला, एलेक्स र उज्ज्वल महेश्वर भट्टराईले स्वर दिएका छन् । गीतको एरेन्जरमेन्ट गोपाल रासाइलीले गरेका छन् ।

गीतको पहिलो हरफले भन्छ
आजका युवा देशका आधार
नयाँ नेपालका यिनै हुन कर्णधार
अबको नेपाल बलियो नेपाल
स्वस्थ सुन्दर स्वच्छ नेपाल ।

नेपालका नयाँ पुस्ताको आवाज, सोच र आत्मविश्वासलाई उत्सवका रूपमा प्रस्तुत गर्ने सांगीतिक एन्थम सार्वजनिक गरिएको एन्थमको लेखक तथा परिकल्पनाकार बसन्त चौधरी रहेका छन् । युवा पुस्ताको सोच तथा अवधारणामा तयार पारिएको गीतले जेन–जीको निर्भीक ऊर्जा र समसामयिक चेतनालाई सशक्त रूपमा उजागर गरेको छ ।

गीतको भिडियो निर्देशन भने सुरेश पौडेलले गरेका छन् । कोरियोग्राफी सन्दीप भुजेल र छायांकन अमृत सुनुवारको रहेको छ । अमेरिकाबाट क्यामेरामा न्ह्यू बज्राचार्य र नेपालमा विक्रान्तमान श्रेष्ठले साथ दिएका छन् । सिजी ईन्टरटेन्मेन्टबाट सार्वजनिक गरिएको भिडियोमा सम्पादन सुशिल घिमिरेको रहेको छ ।

काठमाडौँ । धार्मिक र सामाजिक दायित्वको भावनालाई आत्मसात् गर्दै बढ्दो उमेर, स्वास्थ्य र विदेशिएका सन्ततिप्रतिको चिन्तालाई विषयवस्तु बनाएर तयार पारिएको गीत ‘गयो गयो उमेर, बाँचौं रमेर’ सार्वजनिक गरिएको छ । अभिनेत्री मिथिला शर्मासहितका कलाकारहरूद्वारा अभिनित उक्त गीतको भिडिओमा गीतले दिएको सकारात्मक संदेशको प्रशंसा गरिएको छ ।

अभिनेत्री मिथिला शर्माले लक्ष्मीको सपनाको एउटा हिस्सा बन्न पाउँदा खुसी लागेको बताइन । ‘मलाई भिडिओमा काम गर्ने अफर आउँदा म गायिका लक्ष्मीको परिवार प्रतिको त्याग र अहिले परिवारकै साथका कारण गायिका बनेको सुन्दा प्रभावित भएँ । हामी कलाकारितामा लाग्नेले परिवारको साथ नभई आफ्नो उदेश्यमा सफलता पाउन सक्दैनौँ । लक्ष्मीजी ढिलै भएपनि गायनमा आउनुभएको छ, अब निरन्तरता दिनुहुनेछ भन्ने आश छ’, अभिनेत्री शर्माले भनिन् ।

गायिका लक्ष्मीले बाल्यकालदेखि नै गायनमा रूची भएता पनि पारिवारिक दायित्वका कारण निरन्तरता दिन नसकेको बताइन । ‘मैले परिवारलाई समय दिएँ, किनकी त्यो समयमा मेरो त्यही दायित्व थियो । अहिले परिवारको साथले मैले आफ्नो सपना पुरा गरेकी छु । आफ्नो सपनामा इमान्दार भएर लाग्यो भने त्यसले पूर्णता पाउँछ भन्ने सुनेकी थिएँ, आज आफैँमा त्यो यथार्थ बन्यो’, गायिका महर्जनले भनिन् ।

उनले आफ्नो दिदी सुशीला भुजेलले रचना गरेको शब्दलाई स्वर खोज्दै सङ्गीतकार कहाँ पुगेको स्मरण गरिन् । ‘मैले डमी गाएकी थिएँ, हामी अर्कै स्वर खोजिरहेका थियौँ । सङ्गीतकारले मेरो स्वरमै सुहाउँछ भनेपछि मैले गएकी हुँ । यो सुरुआत हो, मैले पहिलो पाइला टेकेकी छु’, गायिका महर्जनले भनिन् ।

उक्त गीतमा शिव शाहीको कर्णप्रिय सङ्गीत रहेको छ । सार्वजनिक भिडियोमा अभिनेत्री शर्मासँगै कृष्ण भक्त महर्जन, अर्जुन रञ्जित, जिनेन्द्र मान जोशी, न्युछे महर्जन, सुशीला भुजेल, लक्ष्मी भुजेल महर्जन, सबिना महर्जन, उर्मिला जोशी, श्रीजना मानन्धर, लीला कट्टेल, जिभिसन मान जोशी, बीना जोशी, नीरज अंशु प्रधान, चन्द्र मान श्रेष्ठ, रमेश श्रेष्ठ, राहुल थापा लगायतले अभिनय गरेका छन् । निर्देशक रवि सायमीको निर्देशनमा तयार भएको उक्त भिडिओमा भवानी शिलाकारले छायांकन, प्रिया कार्कीले शृंगार र निर्देशक स्वयम् सायमीले सम्पादन गरेका छन् ।