काठमाडौँ- मधेश प्रदेशका मुख्यमन्त्री कृष्णप्रसाद यादवले प्रधानमन्त्री वालेन्द्र शाहमा काम गर्ने हुटहुटी रहेको आफूले पाएको बताएका छन्।

बिहीबार सिंहदरबारस्थित प्रधानमन्त्री तथा मन्त्रिपरिषद् कार्यालयमा प्रधानमन्त्री शाह र प्रदेशका मुख्यमन्त्रीहरूबीच भएको भेटपछि यादवले यस्तो बताएका हुन्।

‘प्रधानमन्त्रीमा काम गर्ने इन्टेनसन रहेको मैले पाएँ,’ मुख्यमन्त्री यादवले हिमालप्रेससँग भने,‘कुरालाई अल्झाउनेभन्दा समाधान दिनुपर्छ भन्ने दृष्टिकोण प्रधानमन्त्रीको रहेछ।’

आफूहरूसँग भएको छलफलका क्रममा प्रधानमन्त्री शाहले धैर्यतापूर्वक कुरा सुनेको उनले बताए। मुख्यमन्त्री यादवले दुई घन्टाका लागि भनिएको छलफल साढे दुई घन्टासम्म चलेको जानकारी दिए।

‘उहाँले धैर्यतापूर्वक सबैथोक सुन्नुभयो, बीचबीचमा प्रश्न पनि गर्नुभयो,’ मुख्यमन्त्री यादवले भने,‘नबुझेका कुरा दोहो¥याएर सोध्नुभयो। हामीले दिएका सुझावहरूलाई सकारात्मक ढंगबाट लिनुभएको छ। सकारात्मक ढंगबाट छलफल सकिएको छ।’

मुख्यमन्त्री यादवले प्रदेशलाई अधिकार सम्पन्न बनाउन प्रदेशमातहत प्रहरी र प्रशासन ल्याउन आवश्यक कानुन निर्माण गर्न प्रधानमन्त्री शाहलाई ध्यानाकर्षण गराएको बताए।

‘प्रहरी प्रशासन अझै प्रदेश मातहत आउन सकेको छैन, यसका लागि प्रहरी र निजामती ऐन संघीय सरकारले ल्याइदिएको छैन, यतातिर संघीय सरकारले ध्यान पु¥याउन आवश्यक छ,’ उनले भने।

मुख्यमन्त्री यादवका अनुसार प्रधानमन्त्री शाहले प्रहरी र निजामती ऐनका सम्बन्धमा तत्काल काम अगाडि बढाउन निर्देशन दिएका छन्। उनले भने,‘प्रधानमन्त्रीज्यूले आफ्नो टिमलाई टिपोट गर्न लगाएर तत्काल यस विषयमा काम गर्न निर्देशन दिनुभएको छ।’

आफूले प्रदेशको अनुदान कटौती र राजश्व बाँडफाँटमा विभेद नगर्न प्रधानमन्त्रीलाई अनुरोध गरेको मुख्यमन्त्री यादवले बताए। छलफलका क्रममा पछिल्लो समय भारतीय नाकामा सर्वसधारणलाई देखिएको समस्याबारे समेत कुरा उठेको थियो।

सय रुपैयाँभन्दा बढीको सामान ल्याउँदा अनिवार्य भन्सार तिर्नुपर्ने प्रावधानमा कडाइ गर्दा नाका क्षेत्रका सर्वसाधारण नागरिकले समस्या भोग्नुपरेको आफूले प्रधानमन्त्रीलाई जानकारी गराएको मुख्यमन्त्री यादवले बताए। जवाफमा प्रधानमन्त्री शाहले सर्वसाधरण नागरिकलाई अप्ठ्यारो पर्ने गरी कुनै निर्देशन नभएको बताएका थिए।

‘हामीले त्यस्तो केही गरेका छैनौँ, ठूला तस्करी र लागूऔषध नियन्त्रण गर्न निर्देशन भएको छ,’ प्रधानमन्त्री शाहको भनाइ उद्धृत गर्दै मुख्यमन्त्री यादवले भने,‘यो विषय चाँडै समाधान हुन्छ।’

मुख्यमन्त्री यादवले धार्मिक पर्यटनलाई मध्यनजर गरी रामायण सर्किटको कामलाई तीव्रता दिन आवश्यक रहेको बताएका थिए। जवाफमा प्रधानमन्त्री शाहले जनकपुरधाम–अयोध्या–लुम्बिनी जोड्न सकिए धार्मिक पर्यटन फस्टाउने व्यापक संभावना रहेको सुनाएका थिए।

छलफलका क्रममा किसानले भोग्नु परिरहेको मलको समस्या समाधान गर्न, चुरे क्षेत्रको संरक्षणलगायतका विषयमा प्रधानमन्त्रीलाई जानकारी गराएको उनले बताए।

प्रधानमन्त्री नियुक्त भएपछि शाहले पहिलोपटक प्रदेशका मुख्यमन्त्रीहरूसँग छलफल गरेका हुन्। सातै प्रदेशका मुख्यमन्त्रीहरूलाई बोलाइए पनि कोशी र सुदूरपश्चिमका मुख्यमन्त्रीहरू व्यक्तिगत कारणले अनुपस्थित भएका थिए।

काठमाडौँ- प्रधानमन्त्री वालेन्द्र शाहले विभिन्न प्रदेशका मुख्यमन्त्रीहरूसँग छलफल गरेका छन्।

बिहीबार प्रधानमन्त्री कार्यालयमा प्रधानमन्त्री शाहले मुख्यमन्त्रीहरूसँग छलफल गर्दै प्रदेशमा देखिएका समस्या, विकास निर्माणको अवस्था लगायतका विषयमा जानकारी लिएका हुन्।

स्रोत–साधनको समुचित बाँडफाँड सुनिश्चित गर्ने तथा प्रदेशहरूले भोगिरहेका विभिन्न प्रशासनिक र आर्थिक समस्याहरू समाधान गर्ने विषयमा समेत छलफल भएको बागमती प्रदेशका मुख्यमन्त्री इन्द्रबहादुर बानियाँले जानकारी दिए।

तीन तहको सरकारको समन्वय, सहकार्य र सह–अस्तित्वको विषयमा समेत प्रधानमन्त्री शाहसँग छलफल भएको उनले बताए। उनले प्रदेशले पाउने अनुदान यसअघिको भन्दा निकै घट्दै आएको, प्रदेशका गौरव आयोजनाहरुको निर्माण कार्यमा समस्या देखिएको लगायतका विषयमा प्रधानमन्त्रीलाई जानकारी गराएको समेत उल्लेख गरे।
मुख्यमन्त्री बानियाँका अनुसार दुई घन्टाका लागि भनेर बोलाइएको छलफल साढे दुई घन्टासम्म चलेको थियो। प्रधानमन्त्री शाहले मुख्यमन्त्रीहरूले राखेका धारणा धैर्यतापूर्वक सुनको उनले बताए।

त्यसैगरी कर्णाली प्रदेशका मुख्यमन्त्री यामलाल कडेलले प्रदेशको समग्र अवस्थाका बारेमा प्रधानमन्त्रीले जानकारी लिएको बताए। उनले संविधानले नै प्रदेशलाई अधिकार तोके पनि पछिल्लो समय संघीय सरकारका कतिपय परिपत्रहरु संविधानसम्मत नभएको विषयमा समेत प्रधानमन्त्रीलाई जानकारी गराइएको उल्लेख गरे। विकास निर्माण, प्रशासनीक क्षेत्रमा देखिएका समस्याका बारेमा पनि अवगत गराइएको उनको भनाइ छ।

बैठकमा कोशी प्रदेश र सुदूरपश्चिम प्रदेशका मुख्यमन्त्रीहरु भने व्यक्तिगत कारणले अनुपस्थित थिए।

देशको वर्तमान आर्थिक अवस्था, पूर्वाधार विकास, सेवा प्रवाहमा सुधार तथा सुशासन कायम गर्ने विषयमा साझा समझदारी निर्माण गर्ने प्रयासका रुपमा मुख्यमन्त्रीहरुसँग छलफल गरिएको प्रधानमन्त्रीको सचिवालयले जनाएको छ।

काठमाडौँ- प्रधानमन्त्री वालेन्द्र शाह (बालेन) विश्वका १०० प्रभावशाली व्यक्तिको सूचीमा समावेश भएका छन्। अन्तर्राष्ट्रिय सञ्चारमाध्यम टाइम म्यागजिनले सार्वजनिक गरेको ‘सन् २०२६ का विश्वका १०० प्रभावशाली व्यक्तिहरू’ को सूचीमा नेपालका प्रधानमन्त्री बालेनको नाम पनि समेटिएको हो।

टाइमले विश्वका शक्तिशाली राजनीतिज्ञ, कलाकार र चिन्तकहरूको सूचीमा उनलाई ‘नेता क्याटोगोरी’मा समेटेको छ। प्रधानमन्त्री शाहलाई म्यागजिनले ‘हिप–हपका पूर्व स्टार’ र नेपालको इतिहासकै ‘कान्छो प्रधानमन्त्री’ का रूपमा चित्रण गरेको छ। प्रधानमन्त्री बालेन ३६ वर्षका छन्। उनी गएको चैत १३ गते नेपालको ४३ औँ प्रधानमन्त्री नियुक्त भएका हुन्।

प्रधानमन्त्री शाहका लागि टाइमको लेखमा भनिएको छ, ‘बालेनको उदयले नेपालको ३ करोड जनसङ्ख्याको नेतृत्व मात्र गरेको छैन, यसले पुरानो राजनीतिक शैलीलाई पूर्णतः अस्वीकार गरेको छ।’ टाइम म्यागजिनले गत फागुन २१ गते सम्पन्न आम निर्वाचनमा युवापुस्ताको अभूतपूर्व समर्थन र पुराना नेताहरूप्रतिको वितृष्णाका कारण बालेनले सानदार जित हासिल गरेको उल्लेख गरेको छ।

सिभिल इन्जिनियरिङमा स्नातक गरेका शाहले काठमाडौँको मेयर हुँदा फोहोर व्यवस्थापन, शिक्षा र स्वास्थ्य क्षेत्रमा गरेको सुधारलाई राष्ट्रिय तहमा लैजाने चुनौती अब उनीसामु रहेको टिप्पणी पनि म्यागजिनले गरेको छ। जसमा शाहको उदयलाई दक्षिण एसियाको जड सुत्रवादी वंशवादी राजनीति विरुद्धको ठूलो प्रहारको रूपमा व्याख्या गरिएको छ।

यस वर्ष टाइम म्यागजिनको प्रभावशाली व्यक्तिको सूचीमा प्रधानमन्त्री शाहसँगै राजनीतिक नेतृत्वतर्फ अमेरिकी राष्ट्रपति डोनाल्ड ट्रम्प, चिनियाँ राष्ट्रपति सी जिनपिङ, पोप लियो चौधौँ, मेक्सिकोकी राष्ट्रपति क्लाउडिया सेनवाम, मार्क कार्नी र बेन्जामिन नेतान्याहु लगायतका नेताहरु समावेश छन्।