काठमाडौँ
एनआईसी एशिया बैंक लिमिटेडले आफ्ना बैंकिङ सम्पत्ति, गैर–बैंकिङ सम्पत्ति तथा धितो सुरक्षणमा रहेका सम्पत्तिको लिलाम बिक्री सम्बन्धी विस्तृत जानकारी उपलब्ध गराउन एक अनलाइन पोर्टल सार्वजनिक गरेको छ ।

यस पोर्टलमार्फत लिलाममा राखिएका सम्पत्तिको कित्ता नम्बर, क्षेत्रफल, फोटो, नक्सा तथा गुगल म्यापमार्फत स्थान पहिचानसम्बन्धी विवरण सहज रूपमा हेर्न सकिन्छ । ग्राहकले प्रकाशित सूचनामा रहेको क्यूआर कोड स्क्यान गरी सो पोर्टलमा प्रवेश गर्न सक्ने व्यवस्था गरिएको छ ।

यसका साथै, इच्छुक व्यक्तिले आफूले खरिद गर्न चाहेको सम्पत्तिबारे थप जानकारी लिनका लागि पोर्टलमै उपलब्ध मेसेज बक्समार्फत आफ्नो पूरा नाम, इमेल ठेगाना, मोबाइल नम्बर र सम्पर्क ठेगाना उल्लेख गरी सन्देश पठाउन सक्नेछन् । बैंकले उक्त पोर्टलमा नियमित रूपमा लिलामसम्बन्धी नयाँ सूचना तथा सम्पत्तिको विवरण अद्यावधिक गर्ने जनाएको छ, जसबाट ग्राहकले सहज रूपमा आवश्यक जानकारी प्राप्त गरी लाभ लिन सक्ने विश्वास बैंकले व्यक्त गरेको छ ।