अमेरिकी राष्ट्रपति डोनाल्ड ट्रम्पले बाह्य अन्तरिक्षको जीवन तथा एलियनसँग सम्बन्धित सरकारी कागजात सार्वजनिक गर्ने प्रक्रिया सुरु गर्न निर्देशन दिएका छन्। उनले रक्षा मन्त्रालयसहित विभिन्न सरकारी निकायलाई यस्ता फाइलहरू पहिचान गरी सार्वजनिक गर्ने तयारी गर्न भनेका हुन्।

ट्रम्पले यो घोषणा आफ्नै सामाजिक सञ्जालमार्फत गरेका हुन्। यसअघि उनले पूर्व राष्ट्रपति बराक ओबामामाथि गोप्य सूचना सार्वजनिक गरेको आरोप लगाएका थिए। ओबामाले गत साता एक अन्तर्वार्ताका क्रममा “एलियन वास्तविक छन्” भन्ने अभिव्यक्ति दिएका थिए। उक्त अभिव्यक्तिलाई ट्रम्पले ठूलो गल्ती भएको बताएका छन्।

ट्रम्पले भने, “ओबामाले त्यस्तो कुरा गर्नु हुँदैनथ्यो। त्यो ठूलो गल्ती हो।” आफू एलियनको अस्तित्वबारे के सोच्नुहुन्छ भन्ने प्रश्नमा ट्रम्पले भने, “मलाई थाहा छैन, उनीहरू वास्तविक छन् कि छैनन्।”

पूर्व राष्ट्रपति ओबामाले ब्रायन टायलर कोहेनसँग कुरा गर्दै एलियनबारे प्रतिक्रिया दिएका थिए। उनले भनेका थिए, “उनीहरू वास्तविक छन्, तर मैले देखेको छैन, र उनीहरू कुनै गोप्य स्थलमा लुकाइएका छैनन्।” पछि सामाजिक सञ्जालमार्फत स्पष्टीकरण दिँदै ओबामाले आफ्नो कार्यकाल (सन् २००९ देखि २०१७) मा बाह्य जीवनसँग सम्पर्क भएको कुनै प्रमाण नदेखिएको बताएका छन्। उनले लेखेका छन्, “मेरो कार्यकालमा पृथ्वीबाहिरका जीवसँग सम्पर्क भएको कुनै प्रमाण भेटिएन।”

यस विषयमा उनले कुनै गोप्य जानकारी सार्वजनिक गरेको संकेत भने देखिएको छैन। ट्रम्प र ओबामा लामो समयदेखि राजनीतिक प्रतिस्पर्धीका रूपमा चिनिँदै आएका छन्। केही घण्टापछि ट्रम्पले पुनः सन्देश प्रकाशित गर्दै जनचासोको आधारमा बाह्य अन्तरिक्ष जीवन, अपरिचित उड्ने वस्तु  तथा अपरिचित आकाशीय घटना सँग सम्बन्धित सम्पूर्ण कागजात सार्वजनिक गर्ने पहल गर्ने बताएका छन्।

यसैबीच, अमेरिकी रक्षा मन्त्रालयले सन् २०२४ मा सार्वजनिक गरेको प्रतिवेदनमा सरकारले बाह्य जीवन भेटेको कुनै प्रमाण नभएको उल्लेख गरिएको छ।

अधिकांश अपरिचित उड्ने वस्तुका घटना सामान्य वस्तु नै भएको निष्कर्ष पनि प्रतिवेदनमा समेटिएको छ। यसअघि सन् २०२३ मा अमेरिकी प्रतिनिधि सभाले अपरिचित आकाशीय घटनाबारे छलफल गरेको थियो, तर उक्त छलफलबाट बाह्य जीवनबारे कुनै ठोस पुष्टि हुन सकेको थिएन।

अमेरिकाका राष्ट्रपति डोनाल्ड ट्रम्पले इरानको आणविक कार्यक्रमका सम्बन्धमा ‘अर्थपूर्ण सहमति’ नभए गम्भीर परिणाम भोग्नुपर्ने चेतावनी दिएका छन्। वार्ता सफल हुन्छ वा हुँदैन भन्ने विषय आगामी १० दिनभित्र स्पष्ट हुने उनले बताएका हुन्।

वासिङ्टन डीसीमा आयोजित ‘शान्ति बोर्ड’को पहिलो बैठकलाई सम्बोधन गर्दै उनले भने, “हामीले अर्थपूर्ण सहमति गर्नैपर्छ, अन्यथा नराम्रो परिणाम आउन सक्छ।” उनले इरानसँग सहमति जुटाउनु विगतदेखि नै चुनौतीपूर्ण रहेको समेत उल्लेख गरे।

हालैका दिनमा अमेरिका र इरानबीच स्विट्जरल्याण्डमा अप्रत्यक्ष वार्ता अघि बढिरहेको बताइएको छ। अमेरिकी विशेष दूत स्टिभ विटकोफ र ट्रम्पका ज्वाइँ जारेड कुशनरले इरानी पक्षसँग सकारात्मक छलफल गरेको ट्रम्पले जानकारी दिए।

यसैबीच, अमेरिकाले मध्यपूर्व क्षेत्रमा सैन्य उपस्थिति बढाएको छ। गत वर्षको जुन महिनामा अमेरिकी मिसाइल र विमानले इरानका तीन आणविक केन्द्रहरूमा आक्रमण गरेका थिए। यस साता नयाँ सैन्य विकल्पहरूबारे छलफल भइरहेको समाचार सार्वजनिक भएसँगै अमेरिकी युद्धपोतहरू त्यस क्षेत्रतर्फ पठाइएका छन्।

तर, बेलायत सरकारले सम्भावित आक्रमणका लागि आफ्नो सैन्य अड्डा प्रयोग गर्न अनुमति नदिएको बुझिएको छ। विगतमा अमेरिकाले बेलायतस्थित आरएएफ फेयरफोर्ड र हिन्द महासागरस्थित डिएगो गार्सिया सैन्य अड्डा प्रयोग गर्दै आएको थियो।

इरानका सर्वोच्च नेता आयातोल्लाह अली खामेनेईले सामाजिक सञ्जालमार्फत अमेरिकालाई कडा चेतावनी दिएका छन्। उनले अमेरिकी युद्धपोतहरू खतरनाक भए तापनि तिनलाई समुद्रको पिँधमा पुऱ्याउन सक्ने (इरानी) शक्ति अझ बढी खतरनाक हुने बताएका छन्।

अर्कोतर्फ, अमेरिकी कंग्रेसका केही सदस्यहरूले इरानविरुद्ध सैन्य कारबाही गर्नुअघि संसदीय स्वीकृति आवश्यक पर्ने अडान राखेका छन्। क्यालिफोर्नियाका डेमोक्रेट सांसद रो खन्नाले इरानसँगको युद्ध विनाशकारी हुने चेतावनी दिँदै ९ करोड जनसंख्या भएको इरानसँग बलियो हवाई सुरक्षा र सैन्य क्षमता रहेको उल्लेख गरे। उनले मध्यपूर्वमा रहेका हजारौँ अमेरिकी सैनिकहरू इरानी प्रतिकारको जोखिममा पर्न सक्ने बताएका छन्।

अहिले अमेरिका–इरान सम्बन्ध पुनः अत्यन्तै संवेदनशील मोडमा पुगेको छ। आगामी केही दिनभित्र कूटनीतिक सहमति हुन्छ वा सैन्य विकल्प रोजिन्छ भन्ने विषयमा अन्तर्राष्ट्रिय समुदायको ध्यान केन्द्रित भएको छ।