माेरङ –साविक उपविजेता चर्च ब्वाईज युनाइटेडलाई ३ शुन्यले स्तब्ध बनाउँदै विराटनगरको सम्राट स्पोर्टिंग क्लब विराट गोल्डकपको फाइनलमा प्रवेश गरेको छ। सहिद मैदानमा जारी गोल्डकप अन्तर्गत बिहीबार राति भएको दोस्रो सेमीफाइनलमा मोरङ लिग विजेता सम्राटले ए डिभिजन लिग विजेता टोली चर्च ब्वाईजको चुनौति सहजै पाखा लगाएको हो।

जितसंगै विराट गोल्डकपमा पहिलोपटक सहभागिता जनाएको सम्राट स्पोर्टिंग क्लबले शनिबार हुने फाइनलमा झापा एघारको सामना गर्नेछ। चर्च ब्वाईजलाई निराश बनाउने क्रममा सम्राटका सौरभ तामाङ, आदित्य शाक्य र विवेक राईले १–१ गोल गरेका थिए। रोमान्चक बनेको खेलमा घरेलु टोली सम्राटले खेलको सुरुवातबाट चर्च ब्वाइजमाथि दबाव बनाएको थियो। दबाव बनाउने क्रममा सम्राटले पहिलो हाफमा गोलका केही राम्रा अवसरहरु गुमाएको थियो।

पहिलो हाफ गोलरहित सकिएपनि दोस्रो हाफमा प्रशिक्षक पारस चौधरीको आक्रमक रणनीतिसंगै सम्राटले चर्च ब्वाईजलाई थप दबावमा राख्यो। खेलको ५० औं मिनेटमा सम्राटका लागि सौरभ तामाङले गोल गर्दै अग्रता दिलाए। निर्धारित ९० मिनेटको खेलमा एक शुन्यले पछि परेको चर्च ब्वाईज थप गरिएको ७ मिनेटको समयमा सम्हालिन सकेन। जसको फाइदा सम्राटले लिएको थियो। निर्धारित समयको खेलपछि थप गरिएको ७ मिनेटमा सम्राटका लागि आदित्य शाक्य र विवेक राईले गोल गर्दै टोलीको जित सुनिश्चित बनाए।

सम्राटले यसअघि क्वाटरफाइनमा भारतको विर्सामुण्डा स्पोट्र्स एकेडेमीलाई ३–१ ले पराजित गरेको थियो। अर्कोतर्फ, झापा–११ ले नेपाल पुलिस र त्रिभुवन आर्मीलाई पाखा लगाउँदै फाइनल पुगिसकेको छ। प्रतियोगिताको विजेताले ११ लाख र उपविजेताले ५ लाख रुपैयाँ नगद पुरस्कार प्राप्त गर्ने आयोजक विराट गोल्डकप फुटबल ट्रष्टका प्रवक्ता धनकुमार लामाले जानकारी दिए।उनका अनुसार शनिबार हुने फाइनलमा प्रतिनिधि सभाका सभामुख डोलप्रसाद अर्याल प्रमुख अतिथिका रुपमा आउने प्रवक्ता लामाले जानकारी दिए।

युरोपियन च्याम्पियन्स लिगको सेमिफाइनल समीकरण पूरा भएको छ। बुधबार राति भएको खेलमा इंग्लिस क्लब आर्सनललाई उसकै मैदानमा पोर्चुगिज क्लब स्पोर्टिङ सिपीले गोलरहित बराबरीमा रोके पनि ऐतिहासिक सेमिफाइनलमा स्थान बनाउन पर्याप्त भएन। आर्सनलका लागि पहिलो लेगमा गरेको एकमात्र गोल निर्णायक बन्यो।

स्पोर्टिङ सिपीका मुख्य प्रशिक्षक रुइन बोर्गेसले आफ्नो टोली प्रतियोगिताबाट बाहिरिएपछि केही निराश अवश्य हुनेछन्, तर उनले आर्सनल जस्तो बलियो र प्रिमियर लिगको शीर्ष टोलीविरुद्ध दिएको प्रदर्शनले उनी खुसी छन्।

आर्सनलले स्पोर्टिङलाई हराउन आफ्नो डिफेन्सलाई उत्कृष्ट अवस्थामा राख्नुपरेको थियो, र उनीहरू केही हदसम्म भाग्यमानी पनि रहे। अर्कोतर्फ सिपी भने केही अभागी सावित भयो। पहिलो लेगमा अरुजोको प्रहार बारमा लाग्यो भने दोस्रो लेगमा जेनी काटामोको प्रहार पोस्टमा ठोक्किन पुग्दा सम्भावित बराबरबीको मौका गुम्न पुग्यो।

यद्यपी स्पोर्टिङ अझै पनि घरेलु लिगको उपाधि दौडमा छ, र यस्ता प्रदर्शनहरूले उनीहरूलाई घरेलु सफलता हासिल गर्न थप प्रेरणा दिने अपेक्षा उनीहरुले गरेका छन्। अब प्रतियोगिताको सेमिफाइनलमा आर्सनल र एट्लेटिको म्याड्रिड तथा बार्यन म्युनिख र पेरिस सेन्ट जर्मेइन (पिएसजी)बीच प्रतिस्पर्धा हुनेछ।

पिएसजीले बार्यनलाई समग्रमा ६-४ ले पराजित गर्दे फाइनलमा पुगेको थियो भने एट्लेटिकोले बार्सिलोनालाई हराएको थियो।

बार्यन म्युनिखले पेरिस सेन्ट जर्मेइन (पिएसजी) विरुद्ध सेमिफाइनल भिडन्त पक्का गरेको छ। बुधबार राति भएको च्याम्पियन्स लिगअन्तर्गत क्वाटरफाइनलको दोस्रो लेगमा बार्यनले रियलाई ४-३ ले पराजित गर्दै समग्रमा ६-४ को जित हासिल गर्दै अन्तिम चारमा स्थान पक्का गर्यो।

प्रतिस्पर्धात्मक बनेको दोस्रो लेगमा ७ गोलको थ्रलरबिच जर्मन क्लबले बाजि मार्यो। एक समय रियलले समग्रमै खेल बराबरीको अवस्थामा ल्याएपनि त्यसलाई जोगउन स्पेनिस टोली असफल रह्यो।

क्वाटरफाइनलको दोस्रो लेगको खेलको पहिलो हाफ निकै तीव्र र रोमाञ्चक रह्यो, जहाँ पाँच गोल भए। त्यसपछि दोस्रो हाफमा खेलको गति केही सुस्त भएपनि थप दुई गोल भएका थिए।

खेल अतिरिक्त समयमा जान सक्ने सम्भावना देखिएको थियो, तर खेलको अन्त हुन चार मिनेट बाँकी रहँदा रियल म्याड्रिडका वैकल्पिक खेलाडी एडुवार्डो कामाभिंगालाई समय खेर फाल्ने क्रममा दोस्रो पहेंलो कार्ड दिइयो। जसका कारण रियल १० खेलाडीमा समेटियो। उनले त्यसअघि ह्यारि केनलाई फल गर्दा पहिलो पंहेलो कार्ड पाएका थिए।

तर खेलको नाटकीय गोलको क्रम रोकिएन। खेल सकिन एक मिनेट मात्र बाँकी रहँदा लुइस डियाजले निर्णायक गोल गरे, जुन उनको यस सिजनको २४औं गोल थियो। पूर्व लिभरपुल फरवार्ड डियाजले जमल मुसिएलासँग वान टु वान पास खेल्दै हल्का डिफ्लेक्सनसहित गरेको प्रहारले जाली चुमेको थियो।

पहिलो लेग २-१ ले हारेको रियल म्याड्रिडले एलियन्ज एरेनामा तीनपटक अग्रता लिएको थियो, जहाँ आर्डा गुलरले दुई गोल गरे। तर ह्यारि केनले आफ्नो सिजनको ५०औं गोल गर्दै बायर्नलाई हरेक पटक खेलमा फर्काए।

अन्ततः अतिरिक्त समयमा माइकल ओलीजले चौँथो गोल गर्दै बायर्नलाई ४-३ को जित दिलाउँदै समग्रमा ६–४ को शानदार सफलता सुनिश्चित गरे।