काठमाडौँ । राष्ट्रिय स्वतन्त्र पार्टी (रास्वपा) ले आइटी क्षेत्रलाई ‘राष्ट्रिय रणनीतिक उद्योग’ घोषणा गर्ने बाचा गरेको छ । बिहीबार सुर्खेतमा आयोजित परिवर्तन उद्घोष सभा कार्यक्रममा बाचा पत्र सार्वजनिक गर्दै रास्वपाले यस्तो बाचा गरेको हो ।

रेमिट्यान्स पछि देशको ठुलो खम्बा बन्ने सम्भावना बोकेको सुचना प्रविधि (आइटी ) क्षेत्र भएको भन्दै रास्वपाले आइटी क्षेत्रलाई राष्ट्रिय रणनीतिक उद्योग घोषणा गर्ने जनाएको हो । हालको १.५  अर्ब डलरको निर्यातलाई आगामी १० वर्षमा ३० अर्ब डलर पुर्याउने लक्ष्य प्राप्त गर्न एक स्वायत्त आइटी प्रबर्द्धन बोर्ड गठन गर्ने पनि रास्वपाको बाचा पत्रमा उल्लेख छ ।

साथै, आइटी क्षेत्रका लागि विशेष आयकर सहुलियत, वैदेशिक लगानी भित्र्याउने र नाफा लैजान सरल नीति र बौद्धिक सम्पत्ति धितो राखी सहुलियतपूर्ण ऋणको म्याक्रो व्यवस्था गर्ने रास्वपाको लक्ष्य छ ।

त्यस्तै, नेपाललाई ग्लोबल टेक हब बनाउन सातै प्रदेशमा अत्याधुनिक डिजिटल पार्क निर्माण गरी पाँच लाख प्रत्यक्ष रोजगारी सुनिश्चित गर्ने रास्वपाको बाचा पत्रमा उल्लेख छ ।

काठमाडौँ । राष्ट्रिय स्वतन्त्र पार्टी (रास्वपा)ले ‘बाचा पत्र’ सार्वजनिक गरेको छ । रास्वपाले सुर्खेतमा आयोजित परिवर्तन उद्घोष सभामा बिहीबार ‘बाचा पत्र’ पनि सार्वजनिक गरेको हो ।

‘बाचा पत्र’मा रास्वपा पूँजी बजारमा संस्थागत लगानीकर्ताको विस्तार गर्न पेन्सन फन्ड, म्युचुअल फन्ड आदि संस्थाहरुलाई सक्रिय लगानी गर्न प्रोत्साहन र सहजीकरण गर्ने उल्लेख गरेको छ ।

त्यस्तै, रास्वपाले वर्षौंदेखि रोकिएको गैर–आवासीय नेपालीलाई नेप्सेमा कारोकार गर्न सहज नीति तर्जुमा गर्ने पनि घोषणा गरेको छ ।

साथै वस्तु विनिमय बजार यथाशीघ्र सञ्चालनमा ल्याउने र त्यसका लागि पब्लिक वेयरहाउजिङ ऐन जारी गर्ने र विभिन्न किसिमका फण्ड, डेरिभेटिभ बजार तथा जोखिम व्यवस्थापन उपकरणहरुको विकास गरी पूँजी बजारलाई आधुनिक र विविधीकृत बनाउने पनि रास्वपाले ‘बाचा पत्र’मा उल्लेख गरेको छ ।

त्यस्तै, साना लगानीकर्ताहरुको हित रक्षाका लागि वित्तीय साक्षरता अभियान सञ्चालन गर्नुका साथै सूचीकृत कम्पनीहरुको वित्तीय विवरणको पारदर्शीता र सुशासन सुनिश्चित गर्न ‘स्वचालित रिपोर्टिङ प्रणाली’ अनिवार्य गर्ने पनि रास्वपाले बाचा गरेको छ ।

रास्वपाले बाचा पत्रमा पूँजी बजारलाई केवल काठमाडौँ केन्द्रित नबनाई डिजिटल माध्यमबाट देशैभरका नागरिक र युवा पुस्ताको सहज पहुँच पुर्याउँदै पूँजी बजारलाई देशको अर्थतन्त्रको वास्तविक ऐना र पूँजी निर्माणको प्रमुख आधारका रुपमा विकास गर्ने पनि उल्लेख गरेको छ ।

काठमाडौँ । राष्ट्रिय स्वतन्त्र पार्टीले पूँजी बजारलाई पारदर्शी, सुरक्षित र लगानीमैत्री बनाउन नियामक सुधार, प्रविधिमैत्री कारोबार प्रणाली तथा लगानीकर्ता संरक्षण संयन्त्र सुदृढ गर्ने घोषणा गरेको छ । बिहीबार ‘बाचा पत्र’ सार्वजनि गर्दै रास्वपाले यस्तो घोषणा गरेको हो । 

रास्वपाले ‘बाचा पत्र’मार्फत धितापेत्र ऐन, २०६३ मा आवश्यक संशोधन गरी धितोपत्र बोर्डको संरचना पुनर्गठन गर्दै पर्याप्त जनशक्ति, कार्यक्षमता अभिवृद्धि तथा आवश्यक स्वायत्तता दिने पनि घोषणा गरेको छ । 

त्यस्तै, नेपाल स्टक एक्सचेञ्ज (नेप्से) र सिडिएस एण्ड क्लियरिङ लिमिटेडको पुनः संरचना गरी निजी क्षेत्रको सेयर सहभागिता बढाउने र प्रतिस्पर्धात्मक डिपोजिटरी सेवा विकास गर्ने पनि रास्वपाले घोषणा गरेको छ । 

त्यस्तै, पूँजी बजारको तरलता, पारदर्शिता र जोखिम व्यवस्थापन क्षमता अभिवृद्धि गर्न स्पष्ट कानूनी संरचना र कडा नियमनसहित इन्ट्राडे कारोबार, शर्ट सेलिङ तथा फ्युचर्स, अप्सन लगायतका डेरिभेटिभ वित्तीय उपकरणहरु चरणबद्ध रुपमा सुरु गरी नेप्सेलाई अन्तराष्ट्रिय स्तरको बनाउने पनि रास्वपाले बाचा गरेको छ । 

अर्कोतर्फ इन्साइडर ट्रेडिङर बजार हेरफेरविरुद्ध शून्य सहनशीलताको नीति लागू गर्दै आईपीओ प्रणालीमा आमूल सुधार गरी निष्पक्ष बाँडफाँड, बुक बिल्डिङ सुधार र समयमै सूचीकरण गर्ने व्यवस्था मिलाउने रास्वपाले घोषणा गरेको छ ।