काठमाडौं । नेपाल राष्ट्र बैंकले आगामी साताभित्र चालु आर्थिक वर्ष २०८२।८३ को मौद्रिक नीतिको अर्धवार्षिक समीक्षा ल्याउने तयारी गरिरहेको छ।

नेपाल राष्ट्र बैंक ऐन, २०५८ मा भएको व्यवस्थाअनुसार नयाँ आर्थिक वर्ष सुरु भएको १५ दिनभित्र वार्षिक मौद्रिक नीति ल्याउनुपर्छ। हरेक त्रैमास र अर्धवार्षिक समीक्षा त्रैमास सकिएको ४५ दिनभित्र ल्याउनुपर्ने प्रावधान रहेको छ।

सोही प्रावधानबमोजिम आगामी साताभित्र मौद्रिक समीक्षा ल्याउने गरी काम भइरहेको केन्द्रीय बैंकका कार्यकारी निर्देशक एवं प्रवक्ता गुरुप्रसाद पौडेलले जानकारी दिए। ‘त्रैमासिक सकिएको ४५ दिनभित्र मौद्रिक समीक्षा ल्याउनैपर्ने प्रावधान छ, त्यसैले शुक्रबारसम्म मौद्रिक समीक्षा सार्वजनिक हुन्छ’, उनले भने।

अहिले आर्थिक अनुसन्धान विभागमा मौद्रिक समीक्षा तयार गर्ने काम भइरहेको पौडेलले जानकारी दिए। ‘२–३ दिनभित्र विभागले मौद्रिक समीक्षा तयार गरी म्यानेजमेन्ट कमिटीमा पठाउन सक्छ’, उनले भने, ‘त्यसपछि कमिटीले सञ्चालक समितिमा पेस गर्ने हो।’

त्यसो त यही फागुन २१ गते हुन गइरहेको प्रतिनिधिसभा सदस्य निर्वाचनका लागि निर्वाचन आचारसंहिता लागू भएको अवस्थामा मौद्रिक समीक्षामा नीतिगत व्यवस्थामा फेरबदल होला वा नहोला भन्ने विषयमा सबैको चासो देखिएको छ। यसमा विषयमा प्रवक्ता पौडेलले आर्थिक अनुसन्धान विभागले आचारसंहिता उल्लंघन नहुने गरी काम गरिरहेको हुन सक्ने बताए। ‘नियमित प्रक्रिया भएकोले मौद्रिक समीक्षा ल्याउन आचारसंहिताले कुनै असर गर्दैन’, उनले भने, ‘तर, केही फेरबदल गर्नुपर्ने अवस्थामा सम्बन्धित विभागले नै निर्वाचन आयोगसँग परामर्श गर्न सक्छ। विभागले परामर्श गरिरहेको छ वा छैन भन्ने विषयमा म जानकार छैन।’

काठमाडौं । वाणिज्य बैंकहरुले चालु आर्थिक वर्ष २०८२।८३ को दोस्रो त्रैमास (साउन–पुस)सम्म कर्मचारीको तलबभत्तामा ३० अर्ब रुपैयाँ बढी खर्च गरेका छन्।

नेपाल राष्ट्र बैंकले सार्वजनिक गरेको तथ्यांकअनुसार २० वटा वाणिज्य बैंकले चालु आर्थिक वर्षको पुससम्म कुल ३० अर्ब १५ करोड ४६ लाख रुपैयाँ खर्च गरेका हुन्। अघिल्लो वर्ष २०८१।८२ को यही अवधिसम्मको तुलनामा बैंकहरुको खर्च ५.९० प्रतिशतले बढेको छ। अघिल्लो वर्ष यही अवधिसम्म बैंकहरुले कर्मचारीको तलबभत्तामा २८ अर्ब ४७ करोड ४३ लाख रुपैयाँ खर्च गरेका थिए।

समीक्षा अवधिसम्म सबैभन्दा बढी खर्च गर्नेमा राष्ट्रिय वाणिज्य बैंकहरु रहेको छ भने खर्च वृद्धिका हिसाबले सिटिजन बैंक अगाडि रहेको छ। अघिल्लो वर्षको तुलनामा १७ वटा बैंकको खर्च बढेको छ भने ३ वटाको घटेको छ।

चालु आर्थिक वर्षको पुससम्म राष्ट्रिय वाणिज्य बैंकले कर्मचारीको तलबभत्ता सर्वाधिक २ अर्ब ३१ करोड ५६ लाख रुपैयाँ खर्च गरेको छ। अघिल्लो वर्ष यही अवधिसम्म बैंकले २ अर्ब ७ करोड ५० लाख रुपैया खर्च गरेको छ। अघिल्लो वर्षको तुलनामा बैंकको यस्तो खर्च ११.५९ प्रतिशतले बढेको छ।

यसैगरी कर्मचारीको तलबभत्तामा दोस्रो धेरै खर्च गर्नेमा नबिल बैंक रहेको छ। पुससम्म यो बैंकले कुल २ अर्ब १४ करोड ६ लाख रुपैयाँ खर्च गरेको छ। अघिल्लो वर्ष यही अवधिसम्म १ अर्ब ८६ करोड ५६ लाख रुपैयाँ खर्च गरेको थियो। अघिल्लो वर्षको तुलनामा बैंकको खर्च १४.७३ प्रतिशतले बढेको छ।

तेस्रो धेरै खर्च गर्नेमा ग्लोबल आइएमई बैंक रहेको छ। अघिल्लो वर्ष पुससम्म यो बैंकले कर्मचारीको तलबभत्तामा १ अर्ब ८४ करोड ४४ लाख रुपैयाँ खर्च गरेकोमा समीक्षा अवधिमा ११.३२ प्रतिशतले बढेर २ अर्ब ५ करोड ३३ लाख रुपैयाँ पुगेको छ।

कर्मचारीको तलबभत्तामा खर्च वृद्धि दरका हिसाबले सिटिजन बैंकको सर्वाधिक २२.९७ प्रतिशत रहेको छ। अघिल्लो वर्ष यो बैंकले ८३ करोड ८९ लाख रुपैयाँ खर्च गरेकोमा समीक्षा अवधिमा बढेर १ अर्ब ३ करोड १६ लाख रुपैयाँ पुगेको छ।

समीक्षा अवधिसम्म कर्मचारीको तलबभत्तामा सर्वाधिक कम खर्च स्ट्यान्टर्ट चार्टर्ड बैंक रहेको छ। यो बैंकले ५२ करोड २२ लाख रुपैयाँ खर्च गरेको छ। अघिल्लो वर्ष यही अवधिससम्म बैंकले ५४ करोड ३० लाख रुपैयाँ खर्च गरेको थियो। अघिल्लो वर्षको तुलनामा समीक्षा अवधिमा बैंकको खर्च ३.८३ प्रतिशतले घटेको छ।

स्ट्यान्डर्ड चार्टर्ड बैंकसँगै एनआईसी एसिया बैंक र प्रभु बैंकको कर्मचारीको तलबभत्तामा जाने खर्च घटेको छ भने बाँकी १७ वटाको बढेको छ।

कर्मचारीको तलबभत्तामा कुन बैंक गरे कति खर्च ?