धारिलो हतियार प्रयोग गरी एक व्यक्तिलाई घाइते बनाएको आरोपमा स्याङ्जा प्रहरीले एक जनालाई पक्राउ गरेको छ ।

पुतलीबजार नगरपालिका–१३ छहरीखोलास्थित सामुदायिक बनमा सालको रूख काट्ने विषयलाई लिएर भएको विवादले उग्र रूप लिँदा ४८ वर्षीय पूर्णबहादुर अधिकारी घाइते भएका थिए । शनिबार राति करिब ८ बजेको समयमा भएको झगडाका क्रममा घाँटीको बाँया भागमा धारिलो हतियार प्रहार गरी घाइते बनाएर आरोपी फरार भएको सूचना प्रहरीले पाएको थियो ।

घटनाको अनुसन्धानका क्रममा जिल्ला प्रहरी कार्यालय स्याङ्जाबाट खटिएको विशेष अपरेशन टोलीले पुतलीबजार नगरपालिका–१४ धारापानीका ४९ वर्षीय विष्णु भन्ने टोपबहादुर अधिकारीलाई सतौं मैदानबाट आइतबार बिहान ३:२५ बजे पक्राउ गरेको प्रहरी निरीक्षक कमल नेपालीले जानकारी दिए ।

पक्राउ परेका अधिकारीविरुद्ध ज्यान मार्ने उद्योग मुद्दामा स्याङ्जा जिल्ला अदालतबाट सात दिनको म्याद थप अनुमति लिई थप अनुसन्धान अघि बढाइएको प्रहरीले जनाएको छ । घाइते पूर्णबहादुर अधिकारीको पोखरास्थित चरक अस्पतालमा उपचार भइरहेको छ ।

स्याङ्जाको हरिनास गाउँपालिकामा आयोजित अन्तर विद्यालयस्तरीय सातौं राष्ट्रपति रनिङ शिल्ड प्रतियोगिताको उपाधि जनजागृती माध्यमिक विद्यालयले जितेको छ ।

“स्वास्थ्यका लागि खेलकुद, राष्ट्रका लागि खेलकुद” भन्ने मूल नाराका साथ हरिनास गाउँपालिकास्थित खेल मैदानमा सम्पन्न प्रतियोगितामा जनजागृती माविले ८ स्वर्ण, २ रजत र ६ कास्य गरी कुल १६ पदक हासिल गर्दै प्रथम स्थान प्राप्त गरेको हो ।

प्रतियोगितामा पिताम्बर माध्यमिक विद्यालयले ५ स्वर्ण, ६ रजत र ५ कास्य गरी १६ पदकसहित उपविजेता बन्न सफल भयो भने महिमा माध्यमिक विद्यालयले ४ स्वर्ण, ८ रजत र ४ कास्य गरी १६ पदक प्राप्त गर्दै तृतीय स्थानमा सीमित रह्यो ।

विजेता, उपविजेता र तृतीय हुने विद्यालयलाई गाउँपालिकाका अध्यक्ष खिम नारायण मानन्धरले क्रमशः ३० हजार, २० हजार र १० हजार रुपैयाँ नगदसहित शिल्ड, मेडल र प्रमाणपत्र वितरण गरेका थिए ।

सो अवसरमा अध्यक्ष मानन्धरले गाउँपालिकाले बालबालिकाको सर्वाङ्गीण विकासका लागि खेलकुदलाई प्राथमिकतामा राखेको उल्लेख गर्दै यस्ता प्रतियोगिताले अनुशासन, स्वास्थ्य र नेतृत्व विकासमा महत्वपूर्ण योगदान दिने बताए । “पढाइसँगै खेलकुदलाई समान महत्व दिएर सक्षम र आत्मविश्वासी जनशक्ति उत्पादन गर्नु हाम्रो लक्ष्य हो,” अध्यक्ष मानन्धरले भने ।

प्रतियोगितामा हरिनास गाउँपालिकाभित्रका विभिन्न ९ वटा विद्यालयको सहभागिता रहेको थियो ।