एजेन्सी – एस्टन भिल्लाले युरोपा लिग फुटबलको सेमिफाइनलमा स्थान बनाएको छ। भिल्लाले दोस्रो लेगमा बोलोग्नालाई ४-० ले हराएपछि समग्रमा ७-१ को जितसहित अन्तिम चारमा पुगेको हो।

भिल्ला पार्कमा भएको खेलमा घरेलु टोलीले पहिलो हाफमै खेल नियन्त्रणमा लियो। प्रशिक्षक उनाइ एमरीको टोलीले अब सेमिफाइनलमा नटिङ्घम फरेस्टसँग प्रतिस्पर्धा गर्नेछ।

खेलको १६औँ मिनेटमा भिल्लाले अग्रता लियो। लुकास डिन्ये, एमिलियानो बुएन्डिया र मोर्गन रोजर्सबीच उत्कृष्ट तालमेल बनेपछि रोजर्सले दिएको पासमा ओली वाटकिन्सले गोल गर्दै टोलीलाई अगाडि बढाए। यो भिल्लाका लागि वाटकिन्सको १००औँ गोल थियो।

२५औँ मिनेटमा रोजर्सले पेनाल्टी पाए पनि उनको प्रहार गोलरक्षक फेडेरिको राभालियाले बचाए। मार्टिन भिटिकको ह्यान्डबलपछि पेनाल्टी दिइएको थियो।
तर त्यसको एक मिनेटपछि नै भिल्लाले अर्को गोल थप्यो। डिन्येले लामो थ्रोमार्फत बक्सभित्र बल पठाएपछि बुएन्डियाले उत्कृष्ट प्रहार गर्दै गोल गरे।

पहिलो हाफ सकिनुअघि रोजर्स स्वयंले पनि गोल गरे। कप्तान जोन म्याकगिनबाट बक्सको बायाँतर्फ आएको पास नियन्त्रणमा लिएर उनले नजिकको पोस्ट हुँदै गोल गरेका थिए।

खेलको ८९औँ मिनेटमा एज़्री कोन्साले शानदार भली प्रहार गर्दै भिल्लाको जित सुनिश्चित गरे। कर्नरबाट आएको बल बोलोनियाले क्लियर गर्न नसकेपछि कोन्साले गोल गरे।

नटिङ्घम फरेस्ट १-० पोर्टो (समग्र: २-१)

नटिङ्घम फरेस्ट ले पोर्टो माथि १-० को जित निकाल्दै समग्रमा २–१ ले सेमिफाइनलमा स्थान बनाएको छ। खेलको निर्णायक गोल मोर्गन गिब्स–ह्वाइट ले गरे। यसअघि जान बेड्नारेक ले रातो कार्ड पाएपछि पोर्टो १० खेलाडीमा सीमित भएको थियो।

सेल्टा भिगो १-३ फ्राइबर्ग (समग्र: १-६)

फ्राइबर्ग ले स्पेनमा प्रभावशाली प्रदर्शन गर्दै सेल्टा भिगो लाई ३-१ ले हरायो। यससँगै जर्मन टोलीले समग्रमा ६-१ को सहज जित निकाल्दै सेमिफाइनल यात्रा तय गर्‍यो।

रियल बेटिस २-४ ब्रागा (समग्र: ३-५)

ब्रागा ले सेभिल्लामा शानदार पुनरागमन गर्दै रियल बेटिस लाई ४–२ ले हरायो। पहिलो हाफमा पछि परेको अवस्थाबाट फर्किएको ब्रागाले समग्रमा ५-३ को जित निकाल्दै अन्तिम चारमा स्थान सुरक्षित गर्‍यो।

The post एस्टन भिल्ला युरोपमा लिगको सेमिफाइनलमा first appeared on हाम्रो खेलकुद.

विराटनगर (हाम्रो खेलकुद)- घरेलु टोली सम्राट स्पोर्टिङ क्लब विराटनगरमा जारी ३८ औं नोबेल विराट गोल्डकपको फाइनलमा प्रवेश गरेको छ ।

सहिद मैदानमा बिहीबार भएको अन्तिम सेमिफाइनल खेलमा ‘ए’ डिभिजन टोली चर्च ब्वाइज युनाइटेडलाई ३-० ले पराजित गर्दै सम्राटले उपाधि भिडन्त पक्का गरेको हो ।

पहिलो सहभागितामा नै सम्राट विराट गोल्डको फाइनल पुगेको हो । अब शनिबार हुने उपाधि भिडन्तमा सम्राटले झापा–११ को सामना गर्नेछ । प्रतियोगिताको फाइनल खेल शनिबार राति नै हुनेछ ।

आज सम्राटको जितमा सौरभ तामाङ, आदित्य शाक्य र विवेक राईले गोल गरे । खेलको प्यलेर अफ द म्याच सम्राटका सुरुवाती गोल गर्ने सौरभ तामाङ घोषित भए । उनले ११ हजार रुपैयाँ पाए ।

खेलको ५० औँ मिनेटमा सौरभले गोल गर्दै घरेलु टोलीलाई सुरुवाती अग्रता दिलाए। ७ मिनेटको इन्जुरी समयमा सम्राटले थप २ गोल गर्दै जित सुनिश्चित गर्यो ।

इन्जुरी समयको चौथो मिनेटमा आदित्य शाक्यले गोल गर्दै टोलीको अग्रता दोब्बर बनाए । इन्जुरी समयको छैटौँ मिनेटमा विवेक राईले गोल गरेपछि सम्राट ३-० ले विजयी भयो ।

घरेलु दर्शकको भरपुर साथ पाएको सम्राटले सुरुदेखि नै आक्रामक रणनीतिका साथ मैदान उत्रियो। खेलको २९ औँ मिनेटमा आदित्य शाक्यको प्रहार पोस्टभन्दा थोरै माथिबाट बाहिरियो । ३२ औँ मिनेटमा आशिष चौधरीले डिबक्स भित्रबाट गरेको कडा प्रहार पोस्टमा लागेर फर्कियो ।

दोस्रो हाफको सुरुवातमै गोल खाएपछि दबाबमा परेको चर्च ब्वाइजले गोल फर्काउने केही प्रयास गरे पनि सफल हुन सकेन । चर्च ब्वाइजका स्ट्राइकर समिर तामाङ फिनिसिङमा पटक–पटक चुके ।

६७ औँ मिनेटमा समिरको प्रहार पोस्ट नजिकैबाट बाहिरियो भने ७२ औँ मिनेटमा सृजन गौतमको प्रहारले पनि सही दिशा लिन सकेन ।

यसअघि सम्राटले क्वाटरफाइनलमा भारतको विर्सामुण्डा स्पोटर्स एकेडेमीलाई ३-१ ले पराजित गरेको थियो । अर्कोतर्फ, झापा–११ ले नेपाल पुलिस क्लब र त्रिभुवन आर्मी क्लबलाई पाखा लगाउँदै फाइनल पुगिसकेको छ ।

प्रतियोगिताको विजेताले ११ लाख र दोस्रो टोलीले ५ लाख रुपैयाँ पुरस्कार प्राप्त गर्नेछ ।

The post चर्च ब्वाइजलाई स्तब्ध पार्दै सम्राट फाइनलमा first appeared on हाम्रो खेलकुद.

इटहरी (हाम्रो खेलकुद)- प्लानिङ ब्वाइज युनाइटेड
१६ औँ अन्तर्राष्ट्रिय आमन्त्रण इटहरी गोल्डकप फुटबल प्रतियोगिताको सेमिफाइनलमा प्रवेश गरेको छ।

बिहीबार राति भएको क्वाटरफाइनलमा युनाइटेड खर्साङ फुटबल क्लब (युकेएफसी) लाई ३-१ ले पराजित गर्दै प्लानिङ ब्वाइज अन्तिम चारमा पुगेको हो।

बुढासुब्बा गोल्डकप च्याम्पियनसमेत रहेको प्लानिङ ब्वाइजको जितमा कप्तान फागुराम थारुले २ गोल तथा धिरेन्द्र शाहले १ गोल गरे।

खेलको पाँचौँ मिनेटमै प्लानिङ ब्वाइजले अग्रता बनायो। युकेएफसीका दिवश रोयले धिरेन्द्र शाहलाई डि एरियाभित्र फाउल गरेपछि फिफा रेफ्री उमेश बिडारीले प्लानिङ ब्वाइजलाई पेनाल्टी दियो । उक्त पेनाल्टीलाई कप्तान फागुराम थारुले गोलमा परिणत गर्दै टोलीलाई १-० को अग्रता दिलाए।

२३औँ मिनेटमा फागुरामले व्यक्तिगत दोस्रो गोल गर्दै टोलीको अग्रता दोब्बर बनाए। उनले विपक्षी गोलकिपरलाई बिट गर्दै सहज गोल गरे।

त्यसपछि २७औँ मिनेटमा डिफेण्डरको कमजोरीको फाइदा उठाउँदै धिरेन्द्र शाहले गोल गरेपछि पहिलो हाफमै प्लानिङ ब्वाइजले ३-० को बलियो अग्रता बनायो।

दोस्रो हाफमा युकेएफसीले एक गोल फर्कायो। खेलको ५९औँ मिनेटमा निवास राणाले गोल गर्दै अन्तर घटाए पनि त्यो टोलीलाई हारबाट जोगाउन पर्याप्त हुन सकेन।

प्लानिङ ब्वाइजका कप्तान फागुराम थारु खेलको ‘प्लेयर अफ द म्याच’ घोषित भए। उनले १० हजार रुपैयाँ पुरस्कार प्राप्त गरे।

शुक्रबार हुने पहिलो सेमिफाइनल खेलमा युवा समाज र साविक विजेता मछिन्द्र फुटबल क्लबबीच प्रतिस्पर्धा हुनेछ। प्रतियोगिताको फाइनल खेल वैशाख ७ गते हुनेछ।

प्रतियोगिताको विजेताले १० लाख रुपैयाँ र दोस्रो टोलीले ५ लाख रुपैयाँ पुरस्कार प्राप्त गर्नेछ।

The post प्लानिङ ब्वाइज युनाइटेड इटहरी गोल्डकपको सेमिफाइनलमा first appeared on हाम्रो खेलकुद.